上文提要:我女友話「窮遊」係唯一體驗當地文化的方式……

之後女朋友都有同自己朋友去旅行,我發覺佢好多時機票都只不過係平三幾百蚊,但我冇出過聲,直到近期,佢又話好想去東京走一轉,叫我陪佢。呢次我醒喇!我話今次由我去包辦機票酒店,佢同意。但佢話買之前要經佢同意先。

今次東京之旅,時間好彈性,所以我有時間去等比較優惠嘅機票,當中女朋友send過一啲又係嗰間廉航嘅機票我睇,我睇一睇,都要二千頭,唔考慮。

6日4夜 坐ANA嘆台場希爾頓住宿

終於喺上星期,我等到ANA做優惠,8月22日凌晨1點機去,27日凌晨1點機回港,可以住四晚酒店,玩足六日,每人有二件23kg嘅行李,包飛機餐同機上娛樂,票價$2,616。

我見到呢個優惠,同女朋友確認咗假期冇問題,第二日先輕輕鬆鬆去訂機票,訂完機票後,我再慢慢搵酒店。 終於喺昨日,我等到五星級嘅希爾頓酒店做優惠。 住四晚台場希爾頓嘅5星級酒店350呎客房,一張超級大嘅king-sized大床,仲要有露台,望彩虹橋海景夜景嘅房,連晒所有稅,四晚加埋都係三千九百蚊港幣, 我覺得超值,於是就即刻訂咗。

$5,200蚊機票, 加$3,900酒店,每人$4,600就可以坐ANA靚時間飛機,加上四晚5星級嘅希爾頓酒店,我覺得呢個已經係一個無敵價。 於是乎我開開心心咁樣通知女朋友,我搞掂晒所有嘢。

女友嬲爆:「住民宿或者住Airbnb先可以感受到當地嘅文化嘛!」

本以為佢聽完會好開心,但佢聽完之後第一個反應就係:

「吓!每人$4,600? 點解會咁貴呀? 」

「哦,一分錢一分貨嘛! Airline好、酒店好,去個旅行都舒服啲啦!而且又唔使你畀錢嘅,我都係想你玩得開心舒服啫!」

「開心? 我唔覺囉!使多咁多錢,我點會開心呀? 我之前搵畀你嘅機票,$ 1,800就得,民宿每人三百蚊晚,你話唔想同我以外嘅人同房,OK,我就你幫你搵間Airbnb, 七百蚊晚就搞掂,加埋都只不過係$6,400, 即係每人只不過係$3,200,足足平咗$1,400呀, 係每人平$1,400呀!!!!」

「你聽我慢慢解釋好唔好?」

「好,你講。」

「冇錯,每人係多咗千幾蚊,但你知唔知你搵嘅航班同上次一樣,第一日全日浪費晒,又要畀酒店錢,最後嗰晚又要瞓機場,我覺得好辛苦呀!!!」

「咁時間唔啱嘅話,咪改第二班機時間囉!」

「改第二班機要加錢呀!」

「咁都平過你依家呀!」

「我睇過,要靚時間嘅航班,總數只不過平過ANA一百蚊咁大把,咁點解我仲要坐廉航呀? 一個唔該我行李超重,又要補錢,你上次都見識過我哋行李過重而要自己攞啲重嘢落背囊度揹住過關上機啦!」

「你根本上就唔明白我諗咩!」

「諗咩? 爭一百蚊,剩係一個飛機餐又或者唔使坐接駁巴士行樓梯上機嘅服務都值回啦!再唔係嘅,我坐得舒服,唔使被人頂住個心口瞓,又或者唔使趕住早上機放行李而企足大半粒鐘都唔止值100蚊啦!」

「算,我唔同你拗,咁Airbnb嗰度呢,4晚加埋足足慳$1,100呀,點解你又唔住?」

「小姐呀,你間Airbnb成間屋好細呀,睇相得嗰二百幾呎,張床只不過係四呎半, 出出入入都要行成十分鐘先去到地鐵站,你自己諗下啦,由機場坐完JR,要攞住行李去行路再行幾十級樓梯去轉地鐵,然後又攞住個篋搵路搵地鐵站,再行樓梯迫落地鐵度,再行樓梯上番路面然後再拖住個篋行十幾分鐘去搵路搵屋, 你話去嗰時都冇所謂,咁走嗰時個篋你自己都知道有幾重啦! 然後隨時仲會有hand carry攞住,大熱天時好辛苦呀,一個唔該,落樓梯時仆親就仲麻煩添。 你Airbnb係冇服務嘅,四晚用同一條毛巾,四晚冇人執房,而且第一日嘅房內清潔度又可能未達預期。 依家住希爾頓,有靚房靚床靚景好服務, 車站又近,走嗰時又可以坐機場巴士直達機場,連行李都唔使搬, $1,100四晚,值吖!」

「你都唔明,住民宿或者住Airbnb先可以感受到當地嘅文化嘛!」

「我就真係唔明喇! 住民宿又或者Airbnb,我哋又點感受到當地文化呀?」

「算,你都係唔明喇!」

「咁我同你講,我同你都係住公屋嘅,我哋一年三百幾日都焗住要幾個人迫喺一間三、四百呎嘅公屋裡面,瞓嘅係只得三呎半嘅上下格碌架床,我去旅行唔係一定要大使,而係唔想因為慳嗰一千幾百而受苦呀,我想住得舒服少少呀,我想有張大床畀我哋兩個瞓呀,你明唔明?」

「我明,但係真係貴咗嘛!」

「好喇好喇,當我唔明喇,咁依家所有嘢都訂咗,因為全部係特價嘢,條款係訂咗之後冇得更改,都冇辦法喇,咁照去好冇?」

「你都訂晒啦,我仲有得say no咩? 」

「咁咪得囉,嚟啦,開開心心去旅行啦!我保證今次你會飛得舒服,瞓得更舒服。」

朋友講旅行 一定要鬥平?

「嗯,我都知你諗乜,但我有個問題唔知點同朋友交代好。」

「咩問題? 」

「你都知我班fds啦,如果佢哋知我住甚麼希爾頓,就一定會問我做咩唔住hostel或者Airbnb喇!」

「佢哋都黐線嘅,點解我哋去旅行鍾意坐咩住咩,又會關佢哋事呢? 」

「唔係呢,你唔明喇,佢哋總係會覺得我哋好笨,大家去嘅地方、時間都係一樣,而我哋就使費貴過佢哋。」

「我明喇!我終於明白點解每次去完旅行返嚟之後,總會有人問我哋坐邊間airline、機票幾錢,又會問我哋係咪住民宿或者hostel喇!如果答佢哋話唔係,佢哋就會笑我哋使貴咗。」

「咁我可以點應付我班朋友呀?」

「對你班朋友就無謂講得太絕啦,你同佢哋講,佢哋坐開嗰間廉航係大陸海南航空屬下嘅子公司嚟,即係佢哋一直坐緊大陸航空公司呀,你都知啦,中國嘅機隨時會爆炸, 我哋近排先知道,所以情願畀貴少少錢嚟保障自己條命。 至於酒店房,你唔使講太多,你剩係話我唔聽你講就訂咗,然後去到之後,影兩張房間嘅相,然後出露台影張彩虹橋嘅夜景相放上fb同Ig,就自然冇人會話你笨喇!」

「點解咁做就會冇人敢話我哋?」

「好難解釋,總之照做就得喇!」

旅行豐儉由人 唔平唔代表笨

最後女朋友帶住一團疑惑而收線。其實依家真係好多人中咗某廉航公司嘅毒,成日以為自己能夠用超抵價買到超值嘅機位。但其實當中搶機票嘅過程已經將大家迷惑咗。明明傳統公司一做優惠,個價都只係貴過你一千幾百,但服務同保障都好過你好多,起碼最少都唔會突然間無理地取消你班機而不作任何賠償啦!

以前去旅行,人哋只會問你去邊度、玩過啲咩食過啲咩,又或者問你有咩靚相影到,根本就唔會有人問你坐邊間航空公司或者住咩酒店。 而通常只有極之喜歡show off嘅人,先會主動同別人講話自己住邊間五星級靚酒店。 但時移勢易, 依家有啲人以為自己能夠買到平機票就代表自己聰明,而別人買唔到,就覺得別人好笨。但其實當中我哋用咗幾多時間同心血去搶機票呢?

你用時間去慳點錢,人哋用一點錢去買服務,大家嘅需求不同,根本就冇咩好值得取笑。

以後再有人問我點解咁笨唔買廉航機票嘅話,我只會答佢:

「大家所需不同,我需要的是服務和舒適,你懂嗎?」