我女朋友係一個患咗「不去旅行會死病」同埋「異地人格分裂症」嘅病患者,病徵係平時可以慳到日日食茶記,近少少就情願唔搭車慳返幾蚊,為嘅只係儲錢可以一年去到一次旅行。當佢離開咗香港就會人格分裂,平時慳妹性格會蕩然無存,毫不留情咁將儲返嚟嘅錢耗光。

所以千祈唔好信佢講,話咩「去韓國日本食/買仲抵啦!」呢句說話。因為當你認同佢,佢下一句就一定會講「咁我哋去囉好無?」

若你不幸踏咗入鬼門關,就要確確實實咁答:「唔好!」。千祈唔好質疑佢買機票同搵酒店嘅能力,講:「邊有可能買到機票同酒店吖~」

因為第二日,佢就會同你講已經訂好晒機票同酒店。

我就係一個活生生嘅例子,話說有一次,見到香港啲韓國燒肉同部隊鍋好似有寶咁,又貴又少料,泡菜唔係任添,當啲芝士係鑽石粒咁,每次都加得丁屎咁少。

「部隊鍋咪即係車仔麵,使唔使賣到兩舊水啊,唔好食啦。」我咁同女朋友講。

「係啊~韓國好抵食啊,香港同樣價錢嘅燒肉,韓國可以食到韓牛啦!」
「咪係囉!真係飛去韓國食都唔使咁貴…」各位,就係我講咗呢句奶嘢了…
「咁不如去囉~」
「邊買到機票吖唔好傻啦!」

結果,第日女朋友就買咗機票同酒店。

當我身處喺韓國,食完個韓國,喺返酒店嘅途中我先醒覺…
「喂係喎,連埋機票同酒店錢,點會平過喺香港食呢?」
「車~去旅行邊有得咁計~」
「咁妳初初話平過香港!加埋機票同酒店錢咪貴過香港食囉!」
「所以我哋要盡情食多啲,買多啲,咁先抵返條數啊!」

除咗食之外仲有購物,Made in Japan 同Made in Korea就係女朋友嘅目標,世間上已經無嘢可以阻止到女朋友食同買…唯一可以祈求嘅,就係行程結束離開當日,個行李無超重…

呢個就係我第一次中計嘅經歷。
可能你會話「挑!咁你唔去咪乜事都無囉!」
「不去旅行會死病」「異地人格分裂症」傳染性極高,當你去過第一次,就已經返唔到轉頭。

你無辦法拒絕女朋友嘅請求,因為你自己都好想去…
ig:BlueGodZi
專頁:http://www.facebook.com/BlueGodZi

Tags :