聖誕節未到,好多人已經諗定去邊度玩,去食聖誕大餐,又或者行街睇燈飾,我身邊有好多朋友亦訂晒地方開聖誕party。好多年前,我亦係聖誕大忙人嘅一分子,由23號開始幾晚通頂,慶祝到假期放完,甚至再癲啲請多日假,玩多晚歡送聖誕節。

聖誕好去處?不如留在家中自己煮

不過唔知點解,近幾年聖誕節,我連出街睇燈飾都唔想去……

兩年前嘅聖誕,我仲煩惱緊應該同女朋友去食乜,周圍都full booking。女朋友提議:「不如我哋留喺屋企食啦~」

「屋企有乜好食啊?又打邊爐啊?」我。
「整牛扒,買啲生蠔同魚生返嚟食囉!又平啲,又唔使同人迫。」
「咁……食完我哋去睇燈飾啦~」我。

本身只想煮塊牛扒,食少少魚生就算。點知原來都好大工程,女朋友仲要買咗個蛋糕返嚟,剩係洗碗同執垃圾已經花咗半個鐘時間。

原本約定食飽洗埋碗就出門口,但又煮又洗實在太攰,我同女朋友喺梳化睇戲睇到一半就瞓著咗。

再次擘大眼,已經係半夜……
所以嗰年聖誕節完全冇出街,連燈飾都冇睇。

陪身邊人比出街玩更重要

可能年紀大咗,心態都唔同咗,我一諗起條街咁迫,餐廳又要等位,仲要食埋啲擺明收貴幾倍嘅所謂聖誕節套餐。

辛苦工作咗成年,年尾終於有幾日假放,剩係想留喺屋企,好好陪女朋友或陪屋企人。

以前覺得,有得慶祝癲番晚,點解唔玩盡佢?
而家反而覺得陪身邊嘅人更加重要。

拖住女朋友隻手,諗起再過幾日就係新一年,咦~原來我哋又經歷咗一年。
即使一年入面未必每日都咁開心,我哋都會有鬧交嘅時候。
不過既然經歷咗咁多嘢,不如一世都一齊過啦!

相關文章:「女朋友瞓親我膊頭都流口水⋯⋯」| 藍橘子