好多人會覺得空姐好易做,淨係上飛機派下餐

更加有人會將空姐同侍應劃上等號
但其實空姐又點只淨係派餐咁簡單呢?


記得Training嘅時候,Trainer叫我哋想一想「The Roles of Flight Attendant」
令我知道其實空姐係一個一人分飾多角嘅職業
以下就等我黎講下究竟空姐背後要擔當住咩角色啦!

1. 消防員

空姐受過訓練如何撲滅火種
飛機機艙如果起火,我哋要負責滅火
當然飛機機艙起火原因有好多
乘客電子用品、飛機焗爐、飛機儀器等
滅火方法各有唔同,我哋都受過訓練去處理

2. 急救人員

空姐上堂學過急救,而且每年要考番急救課程
心肺復甦法(CPR)係每位空姐都一定會識

係飛機上有乘客感到不適或舊病復發
什麼心臟病發、心絞痛、食物中毒等
我哋都知道如何處理、進行急救及尋找醫療協助
真係少D應變能力都唔得!

3. 警察

飛機上有時會有不守規矩,蠻橫嘅乘客
我哋有指引將乘客不守規矩嘅程度分等級
再按等級作出相應嘅行動
輕者如不遵守空中服務員指示、向空中服務員用粗言穢語等
會有口頭警告、書面警告
重者如向空中服務員動粗、硬闖駕駛艙等
將會被制服扣上手銬,並會通知目的地執法部門接手處理
如何在機上處理和制服此類乘客,我哋都要識
飛機上嘅秩序都係交由空姐去維持架!

4. 逃生專家

當飛機遇上意外,機上所有人要逃生時

我哋都受過訓練,清楚逃生程序同步驟,而且每年都要考試
遇上緊急情況,飛機可能會緊急降落到不同地方
究竟係地面上嘅逃生?定係海面上嘅逃生?
唔同嘅情況都會影響到最後要用邊對機門逃生
以及要帶走機上咩儀器同物品逃生
甚至如何利用逃生設備以增加生還同獲救嘅機會等
空姐都瞭如指掌,而且要係遇到呢D危急情況下處變不驚!

最後一樣,當然就係要派餐啦!

以上嘅所有都係拯救生命嘅職責
而且所有都係每位空中服務員嘅職責
雖然表面睇黎空姐只係每程機派飛機餐
我哋都唔希望機上發生突發事件,要我哋使出真功夫
但我想話俾大家知其實每位空中服務員都唔簡單架!

而且絕對係值得大家尊敬嘅職業!

更多小菲菲空姐嘅日常,請Like FB: 小菲菲空姐日記
歡迎合作邀約

圖: 意大利羅馬許願池,希望每程機都順順利利!

下一頁:空姐迷思 | 10 大唔好再問我的問題!

延伸閱讀:

自己行李自己擺 | 空姐 不是大力士

空姐 不是大力士 | 餐飲服務篇