純情小白兔夠治癒了吧?網上瘋傳一名女子被數十隻兔仔包圍的相片,別稱「兔島」的大久野島又再爆紅。上網搜尋發現,兔島位於剛有直航到達的廣島附近,親身到訪發現萌指數爆登,被一眾兔兔攻陷後,無法自拔!

撰文 | Perrins / 攝影 | Yee Ng @ 新假期周刊

Q1. 「兔島」喺邊?點去?

大久野島位於廣島縣竹原市,屬瀨戶內海國立公園一部分。現時香港有直航前往廣島,碼頭距離火車站約七分鐘步程,可以購買船票、紀念品及雪糕,每日來回共有34班,約半小時至一小時一班,算頻密。回程尾班船7點,如果一日遊要留意時間。

忠海火車站站牌已經有兔子肖像,未出發先興奮!

Q2. 上船前有咩要準備?

上船之前,在碼頭記得記得記得買兔糧,因為島上完全冇得賣,冇糧係手,兔兔係唔會睬你,非常重要!碼頭附近有一間超市,除了入定自己食的乾糧飲品,亦有不少新鮮蔬菜如甘筍、蘋果等,又有免費菜葉畀你拎入兔島餵兔仔,蔬菜最吸引兔兔,想被兔兔包圍記得自備!兔兔,我來了!

島上冇飼料出售,記得在碼頭買定飼料!另外有超市將大量免費菜葉放在門口,任人自取來餵兔,好有心!

坐船時不妨讀下兔島規則,包括不可餵人類食物、避免留下垃圾等。

Q3. 著咩衫去最好?

自然生長的野兔身體算乾淨,不過兔牙及指甲都鋒利,建議穿著有袖衫及長褲以免刮傷。一落船,已經有萌爆兔仔在碼頭迎賓,氹得我哋好開心!沿路都是一大群自由跑動的兔仔,所以島上唯一的車輛旅館接駁車,只能小心翼翼慢行。

走近兔仔佢地會第一時間會衝過來,非常為食!如果你幾秒內仍然未拿出食物,兔仔就會掉頭走,現實過港女。

兔仔非常膽小及脆弱,唔好追趕或者嚇親佢,或試圖抱起或者捉住雙耳,輕輕撫摸好喇。

下一頁:事前準備充足,咁去邊度最多兔?

Q4. 喺邊守株待兔?

兔仔最集中的地方為旅館前方空地,因為多遊人餵飼,吸引兔仔等飯來張口。兔仔唔怕人,一見人就一窩蜂湧過來,又會企身「請請」及抱腳,cute爆!兔仔們搶食激烈,會打起架上來,又會跳起嚇走同伴。唔知飽的兔仔更識得摷袋,或將食物一口搶去逃去無蹤,其實暗裡好蠱惑!

兔仔聞到我的背囊中有大量糧食,就包圍住想摷袋,有冇咁醒?

Q5. 係咪得日頭有得玩?

當然唔係啦!識得玩,記得留到天黑!兔子白天休憩,不時見到牠們懶洋洋攤晒係度,或鍾意匿埋在樹蔭檯底避開陽光,等到天黑才開始活動。

入夜後兔仔更加活潑好動,更加肚餓。

兔仔入夜後明顯比日頭更生猛精靈,周圍跑跑跳跳,又會主動撲向人。不少住客食過晚飯後又再出動玩兔,十一點幾都仍有人玩到唔捨得瞓。晚上兔仔唔會發出奇怪聲響,亦唔會走入渡假村內。晚上兔仔都仍然好活躍,估計因為餓足一晚,特別猖狂,見人就撲。而且遊人冇下午咁多,想獨霸兔仔係呢個時候!

灰兔兔晚上黐地,夜晚行出去時要小心唔好踢到兔仔呀!

下一頁:玩夜咗!冇船返去唔通要瞓街?

Q6. 玩到咁夜瞓邊好?

如果想玩到夜晚,一定會趕唔到尾班船,不過唔駛擔心。島上設有露營地,真正同兔仔同眠!場地可容納十個帳蓬,即使自備帳篷也先要預約,每人每晚¥1,440/HK$94起,另可即場租營,4至5人帳篷¥3,090/HK$203,亦有地墊、燒烤爐等用具租借。

 

Q7. 唔想露營有冇揀?

兔島沒有居民,只有一間渡假村,因屬於國營設置,唔算特別豪華,不過設施齊全,有溫泉浸,玩到攰都可以relax。入面有網球場、露營場、行山徑及沙灘等,有道路可步行或租單車環島一圈,玩兔以外都有其他活動。最大吸引力是望出窗就見到兔仔群,而且可以深夜探兔!

酒店有65間客房,每逢六日及假期都爆滿,一定要提早預約。

房間分8疊至15疊和室,唔想瞓榻榻米亦有兩張單人床的雙人房。

酒店只有一間餐廳,晚餐以自助餐為主,選擇豐富,亦可加錢額外點海鮮及牛肉。

休暇村大久野島
【地址】廣島縣竹原市忠海町大久野島
【電話】+81-(0) 846-26-0321
【房價】每位每晚¥10,080/HK$660起
【交通】JR忠海站步行5分鐘至忠海港碼頭,乘船前往。每半至一小時一班,來回¥620/HK$41。
【網址】www.qkamura.or.jp/ohkuno(中文預約OK)

 

小知識:其實點解兔島會咁多兔仔?

萌爆兔島背後其實有一段黑暗歷史,在二次大戰期間,這裡是製造毒氣的秘密小島,島上除了有一間小小的毒氣資料館,亦保留不少戰時遺跡如炮台舊址、發電廠、戰壕等廢墟。自1963年開設了度假村,成為了人氣觀光地。有傳兔子曾為毒氣試驗品,不過官方解釋是小學生將八隻兔子在此放生,在溫暖及安全的環境下大量繁殖。有兔兔萌化,再陰森恐怖都唔怕啦。

島上仍有不少遺跡的廢墟,現已變成兔子的巢穴。