上次介紹嗰10種12月必試便利店新商品唔知大家試左未呢?趕唔切去食?唔緊要,今個月又有新出既商品喇!有D重要係期間限定,過左就無架喇,去到你唔係唔食﹐唔係唔買呀嘛? 就睇下1月有咩便利店新商品係必試架啦!

01) 季節限定金時蕃薯布甸

特別選用出名甜同淋身既德島鳴門金時產蕃薯,用蛋白重現新鮮蕃薯嘅質感,鮮艷嘅金黃色布甸,入口淡淡蕃薯蓉,只係呢個時節先食到架咋!裡面仲加左少許本格蕃薯燒酒同鹽味,黎調起蕃薯嘅甜味,係真正屬於大人既布甸。

【發售地方】日本全國便利商店、超級市場
【發售日期】1月4日
【價格】138YEN(約HK$9,未含稅)

 

02) 桃哈多濃厚抹茶小牛角包

如果覺得天寒地凍唔想食雪條,但又想食綠茶味零食的話,可以試下呢款桃哈多旗下Paicro新出品嘅濃厚抹茶小牛角包。 牛角包用加左黑蜜既綠茶味糖漿去焗,焗完搽上一層加左宇治抹茶嘅白朱古力,再灑上綠茶粉,綠茶味相當濃郁。今次出品仲比平時嘅牛角包細粒,特別鬆脆入味。

【發售地方】日本全國便利商店、超級市場
【發售日期】1月4日
【價格】140YEN(約HK$9.2,未含稅)

 

03) 節分必食惠方卷

日本人傳統會喺節分當日食惠方卷。惠方即係有利既方位,每年都會唔同。食惠方卷記住要成條食唔好切,食嗰時要對住個方位,唔好講野,腦入面諗住你祈求嘅事到食晒為止。好多便利商店每年都會喺呢個時候推出惠方卷,但大多數都要事先預訂。難得去到日本當然要入鄉隨俗試幵啦,唔想麻煩又想玩下嘅可以喺LAWSON買返條,今年嘅方位係東南偏南,記住唔好搞錯呀!

【發售地方】日本全國LAWSON
【發售日期】1月4日
【價格】390YEN(約HK$26,未含稅)

 

04)LAWSON限定紅豆忌廉三文治

喺日本豆沙包同水果三文治就見得多,紅豆忌廉饀嘅三文治你又見過未?繼上年推出後載譽歸來,餡料繼續採用北海道十勝產既夢紫紅豆,仲特別用左好有咬口嘅鹿之子豆。軟滑嘅忌廉加上粒粒紅豆,網民話食完Lunch整返件當甜品最正!先唔好講味道夾唔夾住,起碼個樣靚仔過明將鎮店之寶紅豆軍艦多好多。

【發售地方】除北海道外,日本全國LAWSON
【發售日期】1月4日
【價格】248YEN(約HK$16.4,未含稅)

 

05)幸福感滿滿的藍莓 Pocky

Pocky喺香港都算係相當有人氣嘅零食,呢款最新嘅Pocky以日本童故事「青鳥」做藍本,餅乾條包住加入果肉嘅藍莓cream,表達出「青鳥」傳遞幸福嘅意思,同最愛嘅人分享就啱晒啦!

【發售地方】日本全國便利商店、超級市場
【發售日期】1月12日
【價格】未定

下一頁:更多1月新品,超新奇口味炒麵你敢唔敢試?!

06) 7仔出品濃厚抹茶朱古力流心雪條

2016年第一彈日本7﹣11推出嘅呢款濃厚抹茶朱古力流心雪條,相信一定可以滿足到綠茶腔嘅你。採用京都名店丸久小山園既宇治抹茶,同盛產可可嘅南美即溶朱古力。帶有少少苦味嘅濃厚抹茶,加上中間香甜嘅爆漿流心朱古力,唔太苦又唔太甜,味道啱啱好。

【發售地方】日本全國7﹣11
【發售日期】1月5日
【價格】199YEN(約HK$13,未含稅)

07) 固力果 X Royce情人節版朱古力

講到日本出名嘅朱古力製造商,又點少得Royce。固力果繼上年情人節同Royce合作,出左 Royce版既果仁朱古力同Caplico迷你朱古力雪糕筒之後,今年又再合作,仲加埋Pocky落去,比平時嘅Pocky長1.5倍,真係俾足料。想用平既價錢買有高級感既朱古力,呢個機會仲唔係你嘅?

【發售地方】日本全國便利商店、超級市場
【發售日期】1月5日
【價格】300YEN(約HK$19.8,未含稅)

 

08)日本限定利士迷你黑糖黃豆粉夾心餅

日本人真係好幸福,好多外國品牌入到日本市場,都會好積極咁研發適合當地人口味嘅產品,好似Haagen-Dazs出嘅糯米糍雪糕,一出就賣斷市。利士都唔執輸,今次就用左日式甜品常用嘅黑糖同黃豆粉黎做忌廉饀,重要係用北海道產嘅黃豆同沖繩產嘅黑糖,名符其實嘅Made in Japan!

【發售地方】日本全國便利商店、超級市場
【發售日期】1月11日
【價格】100YEN(約HK$6.6,未含稅)

 

09)季節限定士多啤梨班戟

講到呢個時節嘅季節性食材,又點少得粒粒香甜嘅士多啤梨?薄薄嘅班戟皮包住香滑嘅Rare Cheese Cream同草莓果醬海綿蛋糕,再加上新鮮士多啤梨嘅點綴,勝在圓圓地細細件,夠晒Kawaii。想平平地食件Cake,呢款蛋糕都係唔錯嘅選擇。


【發售地方】日本全國便利商店
【發售日期】1月5日
【價格】280YEN(約HK$18.5,未含稅)

10)一平夜店特別版朱古力味撈麵

日本人真係創意無極限,朱古力味撈麵咁都俾佢諗到!為左迎接情人節,明星食品將推出特別版朱古力味撈麵。喺朱古力拿鐵加喼汁嘅醬料上,加上朱古力脆脆同玉桂粉,又甜又鹹嘅特別口味,保證令你食上癮。情人節送朱古力送到悶,今年不妨轉下口味,送朱古力味撈麵俾你鐘意嘅人啦!

【發售地方】日本全國便利商店、超級市場
【發售日期】1月18日
【價格】180YEN(約HK$11.9,未含稅)

圖片來源:各大便利店網頁

延伸閱讀:

日本街頭Mario Kart 試玩報告

人生必遊!北海道5大絕景推介

日本最奢華!嚴選10個雪見露天溫泉!

日本滑雪初體驗 5 個常見QnA 

日本13間最特別Starbucks門市之選

最新的日本入境要求詳情?

在入境日本前,建議先用Visit Japan Web完成一部分檢疫手續,便能更快速地入境日本,即睇使用教學,例如註冊步驟及同行家人如何填寫等,以及買定日本電話卡