喂啊！點解我最近返工都成日遇到「傻人發現事件」㗎？話說公司機上嘅免稅品某啲嘢買2件有八五折啦，咁有個香港女人話想睇幾樣嘢，我就攞去畀佢睇……
圖片來源：國泰航空、新傳媒資料室
夾硬攞折扣
女人：「呢兩個咁樣衰嘅，我剩係要呢隻錶就算啦！」
我：「冇問題啊！但提番小姐，買一樣冇折㗎！」
女人：「吓！咩叫冇折？正話又話有八五折？」
我：「係啊！我哋個廣播係話買兩件有八五折啊！咁你買一樣嘢咪冇囉！」
女人：「吓！咁你做個折畀我囉！」
我：「我做唔到㗎！電腦定咗㗎！」
女人：「小小嘢都做唔到，如果你唔畀折我，信唔信我唔買吖嗱？」
我：「明白，咁我失陪先啦！」
腌臢乘客口頭禪
你問我信唔信，我實信㗎！你唔買我又唔會小一忽肉嘅，就算你買，我都只係多70蚊港紙佣金，我真係唔會care㗎傻豬！
點解大家成日覺得，我會唔信你講嘅嘢呢，成日問我信唔信乜乜乜！！！
「信唔信我投訴你？」
「信唔信我唔買？」
「信唔信我以後唔坐？」