長途機派完餐，半夜三更熄晒燈，九成人都瞓晒覺，自然喺廚房入面嘆下頭等鐵觀音啦！點知有人「叮」我哋出去，心諗唔係食杯麵呀嘛！
圖片來源：新傳媒資料室、網上圖片、passengershaming
冇品乘客出沒
「叮」我哋出去嘅，係個鬼仔同個香港女仔……
我：「嗨，有咩幫到你？」
女仔：「你介唔介意叫後面個阿叔唔好頂我張椅背呀？我都唔敢挨後啦，仲有你睇下！」
來自後座的4D衝擊
我當堂想爆粗，個阿叔一隻腳撐住前面個女仔張椅背，另一隻腳除咗襪隊咗上前面個扶手！我真係戥個女仔好慘，一方面有「腳底」幫佢按摩，一方面有「嗅覺享受」！
叫醒個阿叔，仲好意思嫌我嘈醒佢而發我老脾，老老實實，我都唔係省油嘅燈。
我：「先生，麻煩你唔好再撐住前面嘅椅背，因為你令到人哋挨後唔到張椅。仲有，麻煩你唔好再放隻腳去前面，因為咁樣好唔衛生同埋係滋擾性行為！」
阿叔：「麻 鬼 煩！」
無恥到無可匹敵
老老實實，人無恥便無敵，呢個真係無恥到無可匹敵，我真係好想放我啲腳趾落佢個口，不過我係專業嘅，笑下就走咗返去飲茶。
飛機機艙話晒都係公眾地方，我唔明點解有人可以咁冇品，佢嘅行為完全似係冇受過教育咁，大佬，真係好核突！