日本出名食海鮮又平又新鮮,同樣價錢喺香港同日本嘅份可以差一倍,所以唔少人去日本其中一樣必食嘅一定係魚生飯,大家食開嘅都不外乎係魚生平舖喺飯上面嘅,就咁樣已經可以令到大家哇哇叫兼相機食先10分鐘都未放到一啖入口,但如果只係咁就滿足嘅話,實在係太小兒科啦!要食,就一定係食喺九州福岡嘅一間海鮮食店入面嘅極上海鮮丼!

話說早兩日網上流傳咗一碗浮誇到極點嘅魚生飯,啲魚生多到幾層高,成棵聖誕樹咁!連日本電視台都有報導,之後就吸引咗一大班日本市民去試。網上亦都開始出現一堆可怕嘅照片…

咁究竟呢碗魚生飯嘅真面目係點架呢?謎底即將揭開…

首先同大家睇下舖面先,普通一間食店,冇咩特別。話就話係海鮮食店,但日本唔似得香港,係唔興擺個魚缸喺出面嘅。(圖片來源:食べログ)

環境算係唔錯,乾淨企理,有大枱有吧台,一個人嚟食又得,同班friend嚟豪下又得!(圖片來源:食べログ)

坐低當然要睇下menu,作為一個咁浮誇嘅魚生飯,應該係menu頭幾位啦!

如果冇估錯,係你啦!極上おまかせ海鮮丼!2,500円(未連稅),啫係大概$160港紙,仲有個茶碗蒸送添!(圖片來源:食べログ)

咁究竟呢碗魚生飯嘅真面目係點?馬上揭曉!

哇哇哇!會唔會太誇張?(圖片來源:Instagram、Rocket News)

就咁睇相都未必感受到佢嘅氣勢,拎上手就馬上霸氣盡露!(圖片來源:受付嬢ぴみょの美容日記)

霸氣魚生飯有咩料?

細心嘅大家應該會發現點解同一個魚生飯但上面啲料個個都唔一樣嘅?其實因為呢個係おまかせ海鮮丼,所謂嘅おまかせ(讀音:餓媽卡些),其實啫係由廚師話事,魚生飯嚟講,啫係嗰日有咩新鮮就有咩魚生食啦!不過都走唔甩有魚蝦蟹海膽之類,睇下日本網友同大家逐層揭曉有咩食啦!

一上枱,大大隻海膽同你say hi,仲有唔少魚生同三文魚子。(圖片來源:食べログ)

拎開海膽,魚生另上,見到有三文魚、油甘魚、鯛魚刺身等,當然唔少得有蠔啦!(圖片來源:食べログ)

仲有螺同蟹,有咁多料,真係唔使食飯都飽啦!(圖片來源:食べログ)

因為係「餓媽卡些」關係,有時仲會有蝦同蜆等等,有咩食就睇你運氣啦!(圖片來源:食べログ)

其實呢度除咗食魚生飯出名,燒海鮮都一樣好有人氣,就算有朋友唔食生冷嘢都唔驚冇嘢啱食啦!(圖片來源:食べログ)

食前小貼示

大家唔好以為咁抵食質素唔會好得去邊,好多日本網友食完都大讚「餓依C」(好味)!想食呢個呢個極上おまかせ海鮮丼都有啲小秘訣架:

1.呢個2,500円(未連稅)嘅極上おまかせ海鮮丼係午餐價嚟嘅
2.店舖11點開門,想食靚魚生飯最好早啲到啦
3.因為材料有限,店家講明下午1點前就賣完嘅機會係好大架
4.怕太多食唔晒?店家仲提供份量少啲嘅魚生飯,價錢由1,300円(未連稅)-1,800円(未連稅)不等

5.中午食唔到都唔怕,所謂錢解決到嘅問題就唔係問題,夜晚都有提供極上おまかせ海鮮丼,不過就盛惠3,000円(未連稅)

圖片來源:食べログ、INSTAGRAM

詳細資料:

店名:炭火焼 海輪亭
地址:福岡県福岡市南区清水2丁目1-57
交通:搭西鉄天神大牟田線去到高宮站落車再行約16分鐘

營業時間:11:00-14:00、17:00-22:30
休店日:逢星期六、日及假日

 

延伸閱讀:

東京原宿芝士撻 Pablo Cafe 試食報告

九州必去9個景點@Littledraw

日本人為何對香港人躁底?

日圓明年繼續跌、買嘢6折!唱錢 Q&A 你要知

12月遊日必買17種最強手信