做旅遊記者可以周遊列國,表面風光,其實暗裡「一殼眼淚」。特別在大時大節出trip,一支公上飛機,仲要得冇咩選擇的飛機餐,「雞肉飯定牛肉麵?」我好難揀囉!實部分航空公司在傳統節慶日子,都有提供應節食品,隨時有意外驚喜,邊個話飛機餐一定係劣食?

文:yuki@港女講旅行

Q1 | 可遇不可求,除夕、新年特式餐單!

大部分航空公司的飛機餐都會因應季節更換,有幾可咁神心為新正頭幾日,專誠換個餐單啊?唯獨長榮就好有心思,近年都推出應節餐,大除夕就提供「一品佛跳牆」,飛機餐都有龍蝦、元貝食,超有意頭。香港的港龍都唔輸蝕,去年推出「冬季餐單」,雖然並非新年限定,但在高空三萬呎都有得食煲仔菜,新正頭仲提供年糕、蘿蔔糕,咁貼地、咁有中國味,一樣收貨!不過呢,以上都是商務、頭等先有的福利,我呢啲坐經濟嘅,諗下好喇!

Q2 | 中秋、聖誕登機,都有應節小食、小禮物?!

坐經濟位的,偶爾都會收到貼心的小禮物。港龍、中國東方航空試過中秋送月餅,港航亦都試過在聖誕派朱古力。至於新正頭幾日,記者去年坐港航,就有包笑口棗送,收到都幾窩心。去年他們就轉送「角仔」,一樣好有過節氣氛。相反港龍往年都有包笑口棗應下節,但聽空姐朋友話今年cut budget,連笑口棗都冇埋。

Q3 | 唔食A、B餐!仲有冇其他選擇?

大部分航空公司都提供特別餐,在網上check-in的時候,早一日預約埋就得!好似國泰就有超過廿個菜式,記者坐早機多數會安排水果餐;想食清淡的,仲有素食、低鹽菜式,可以不時轉轉口味。如果坐商務、頭等選擇仲多,冬天坐港龍連煲仔飯都有得食!撞正生日、蜜月的特別日子,某些航空公司好似國泰、港航、大韓等等,甚至可以準備埋蛋糕(不過要加錢),所以,邊個話飛機餐冇嘢好揀?

Q4 揀咩菜,先唔易中伏?

食咖喱,永遠萬無一失冇中伏。因為容易保存唔易變壞,即使空姐用微波爐叮熱之後,味道都唔會變差,食落又開胃,所以連空姐在機上用餐,頭號至愛都係咖喱!另外,所有飛機餐都由當地膳食供應,所以食番當地菜式一定最好味!好似由日本飛香港,就必食日本菜;由印度飛香港,就要食印度菜,咁樣中伏率一定大大減低。

相關文章: