白川鄉每年年中就會公布點燈日期及時間,相信好多人喺公布當日,便已經開始加入呢個搶交通、搶住宿嘅混戰裡面!但如果一早本身冇計劃,後知後覺但又好想去咁點好呢?放心!立即教你把握最後機會進入童話世界!

白川鄉點燈 last minute朝聖攻略

方法一:參加本地團

其實喺白川鄉一公布點燈日期,日本有唔少網站就會陸續有由高山或金澤出發嘅旅行團包車服務可以選擇,但基本上依家呢個時間都full晒。當然仲有另外少數不是由白川鄉附近地區出發嘅地方,仲有少量旅行團可以選擇,不過,因為係跟團活動,所以會附帶其他行程。但見佢包酒店包食物仲車埋你去睇點燈。我相信絕對適合唔想用腦又唔熟附近地區嘅你嘅其中一個選擇。唯獨價錢唔平,請大家自行判斷同選擇啦!

選擇1:YOKOSO Japan Tour

1. 由新宿出發:

睇完白川鄉點燈後,會安排喺附近嘅金澤住宿一晚,之後會有參觀金澤兼六園、五箇山等行程,包第二日早餐,每位成人價錢由33,900~35,900 yen不等。詳情按此

2. 由大阪出發:

睇完白川鄉點燈後,會安排喺附近嘅高山住宿一晚,重點係包4餐,包括高山最有名嘅飛驒牛肉料理,價錢48,000 yen左右。詳情按此

3. 由名古屋出發:

喺高山嘆完飛驒牛陶板燒午餐之後,先於高山內遊覽,然後直接到夜晚嘅白川鄉點燈,最後再食多餐飛驒牛料理,先返到名古屋嘅一日團,價錢只係20,000 yen。整體上算係最抵嘅方案!詳情按此

以上係YOKOSO Japan Tour官方網頁其中三個出發去白川鄉嘅行程,想夾啱自己行程從其他地方出發,可以參閱官網~(請留意是有白川鄉燈光投射夜景/ 白川鄉點燈夜景等字眼(如ライトアップ)先至可以睇到點燈夜景~)不過離白川鄉比較近嘅名古屋嘅旅行團有唔少已接近滿員,新宿同大阪就仲有好多空位,有興趣嘅不妨自己格下價!另外,旅遊出發日前7日就截止報名~名額有限,要注意喇!

選擇2:近畿日本tourist

旅程大致分為2種,一種係就咁欣賞點燈,另一種則是包埋展望台單程接駁巴士(只包上坡一程,回程時要徒步落坡)。名古屋出發最抵,唔需要接駁巴士服務嘅話,22,000円起有得book,包接駁巴士嘅旅行團就30,400円起。但須注意,旅程多以2名起先接受預約,截止報名日期為出發嘅8~10日前,check過有唔少旅行團已經只剩2月17日有空位,即係最後點燈日子!真係想去嘅,就盡快訂喇!

1. 東京出發

價錢包東京站往高山嘅新幹線及特急車票、白川鄉展望台接駁巴士、一晚於高山嘅酒店住宿,以及早、晚各一餐。顯示價格為1人價錢,2人起接受預約。詳情按此

2. 大阪出發

價錢包括由新大阪至高山站,普通車指定席車票、白川鄉展望台接駁巴士、一晚於高山嘅酒店住宿,以及早、晚各一餐。顯示價格為1人價錢,2人起接受預約。詳情按此

3. 名古屋出發(不包括接駁巴士)

只係想睇而又唔一定要上展望台嘅話,其實呢個package都幾抵玩!價錢包括名古屋至高山站嘅普通車指定席車票、一晚位於高山嘅酒店,以及早、晚各一餐。成人每人22,000円~25,000円,以7.3算嚟計嘅話,都只係約HK$1,606~1,825,相當抵玩!詳情按此

4. 名古屋出發(包展望台接駁巴士)

包接駁巴士嘅plan比唔包嘅貴8,400円左右,仲諗緊好唔好上展望台影全景靚相嘅話,就要好好考慮喇!除咗接駁巴士之外,同上面同樣由名古屋出發嘅package就只有酒店唔同。呢款package已經搶剩2月17日咋!要訂就快喇!詳情按此

方法二:組團包車

假如你同你嘅同行朋友人數眾多,仲有另外一個比較可行的方法-包車(如人數唔夠,建議可以搵下其他想去嘅人夾份租車)。

1. 濃飛タクシー

2. 宮川タクシー株式会社(Medix Taxi)

3. 山都自動車株式会社

4. 鳩タクシー(Hato Taxi)

以上幾間都提供包車服務(亦可以用英文聯絡),雖然包車都唔平,但人數足夠嘅話,每人share都幾抵嘅!而選擇出發嘅地方都係高山算係最方便。

地點一:落高山,浸溫泉舒疲勞

頭先所講嘅包車建議係距離白川鄉約一個小時嘅高山出發,加上高山都有唔少酒店旅館,睇完點燈用盡力氣唔想再轉地方,就直接喺高山住一晚,的確係最好嘅選擇。而暫時喺日本網站JALAN都見到有每人6,000円左右一晚嘅旅館,不論係和式抑或洋式都一應俱全。咁凍嘅天氣下,順便浸個飛驒高山嘅溫泉真係一流~提提你,記住揀寫明 JR高山站行路約15分鐘內範圍嘅酒店旅館,你都唔想行到變雪條嘅,係咪?

如果真係搵唔到車站附近嘅酒店,上面呢間溫泉酒店都係冇選擇中嘅選擇,因為佢有專車喺車站附近接送。不過要有心理準備要住多人房,因為點燈期真係好多好多人啊!

JALAN:按此

地點二:住金澤,第二日直奔兼六園

如果你想節省時間直接就去金澤瞓番晚,瞓醒就立即去睇兼六園雪吊,咁當晚住金澤唔係唔得,只係由JR高山站搭尾班車到JR金澤的時間係晚上8點55分!

假設好似頭先嘅包車時間係晚上7:00由白川鄉返嚟高山,理應就尚有時間嘅!但萬一你喺白川鄉遲上車或雪地塞車慢駁等因素,可能會令你趕唔到尾班車!所以住金澤嘅話,請自己計好時間!

路線查詢推薦:JORUDAN

延伸閱讀:白川鄉點燈2019須知 | 預約方法、接駁巴士、交通、天氣資訊