女朋友話佢人生最期待嘅畫面終於出現。呢句說話已經由佢搶到演唱會飛開始,講過無數咁多次。

女友洗腦狂播 歌迷早到排長龍

首先我講少少對 BTS防彈少年團 呢隊韓國組合嘅認識,我幾乎認得晒佢哋啲歌,因為每次女朋友用電腦,佢都會喺我耳邊不停重播又重播。不過,我分唔出佢哋邊個打邊個……

演唱會當日,我提早一個鐘到達會場,我以為自己已經好早去到,點知已經見到有一大班人排緊隊入場。

因為場地規定唔可以帶攝錄器材入場,所以臨入場前要檢查背囊。去到晚上7:00,望一望龍尾仲有成差不多一千人未入場。

音樂一響衝入場 千人 MV 大合唱

但恐怖嘅事情發生了!當演唱會場內音樂響起,外面排緊隊嘅粉絲們立即鼓譟,驚自己錯過咗個開場。

「死啦~會唔會趕唔切啊?」女朋友問。
「唔會啦,大把人未入場,佢點會開始吖~」

不過,粉絲們面對偶像往往都係失去理性嘅。所有人聽到音樂奏起就開始唔理三七二十一衝晒入去,檢查手袋嘅工作人員都係望一眼就算。

我同女朋友迫到入表演場地,發現原來只係播緊MV,個show根本就未開始,不過現場嘅狀況,令我完全呆咗……

全場嘅粉絲(BTS粉絲團稱為「阿米」)單單係睇住個MV,已經揮動緊手上嘅燈光棒,一齊大合唱緊……韓文歌詞啊大佬!竟然可以唱晒成首!

韓流造神 「完美的人」不能行差踏錯

接住落嚟終於輪到BTS出場,無論佢哋唱歌、跳舞、講嘢,全場粉絲都會放盡喉嚨尖叫。每次有成員將個咪高峰指向觀眾席,粉絲都可以完美配合,唱晒所有歌詞出嚟。

我知道好多人都唔鍾意韓國娛樂文化,覺得佢哋只靠外表,歌功唔夠好,成日咪嘴,冇實力……

但點解韓流可以令粉絲瘋狂到呢個地步,甚至橫掃全亞洲娛樂產業呢?

你當然可以話班韓粉冇品味,你自己係眾人皆醉我獨醒。但先不論實力,佢哋咁受歡迎,一定有佢嘅原因。

總括而言,韓國娛樂圈係一個「造神」嘅工業。每一位當紅韓星,都係一個神,佢哋唔可以食煙、唔可以講粗口、唔可以被發現犯上亂掉垃圾這類輕微法例,更絕對不可以涉及醉駕、超速等罪行⋯⋯

所有明星喺公眾面前,都必須係一個完美嘅人。而呢堆「神」,並唔係個個成功,韓國每年有數百隊新人組合推出,成功突圍而出嘅只係小貓三、四隻。

一人成功 背後千萬練習生爭出道

而舞台背後,仲有一大班練習生等緊出道,同你爭個你死我活,又或者未浮出水面已經石沉大海。韓國將偶像派推向極致,但唔代表佢哋全部都冇實力。

練習生會中途停學,加入特訓,學習各種「神」嘅技能,包括舞蹈、歌曲、台風……佢哋為咗加入娛樂圈,需要拋棄一切。

但頭先都講過,失敗機率好高,而當佢哋失敗咗,冇學歷冇工作技能,基本上同個廢物冇分別。

反觀香港,好多新人一被發掘,就會即刻被公司推出嚟出碟、拍戲、出show,連面對鏡頭同一般對答都未做得好,完全冇明星魅力。

港大熱歌手 電視難見蹤影

點解要咁做?因為公司哪有錢投資落你新人身上啊?梗係嗱嗱聲推你出去賺錢,就算蝕都唔會蝕咁多。

要講歌唱實力,不得不提香港新一代歌神Eason,佢曾經喺MaMa台上唱〈浮誇〉力壓全場。係!我都聽到毛管棟,仲聽咗好多次!

每次Eason出場,全香港人都會尖叫!大家都咁鍾意Eason……不過佢每次出新碟,你除咗喺YouTube或者音樂會見到佢之外,根本冇機會喺電視上見到佢。

https://www.youtube.com/watch?v=bmU5kWsTjNU

相反韓國只要有新碟推出,歌手或組合都會上晒咁多個電視台,唱同一首歌,連續唱足半個月,聽到你夠晒皮為止。所以,冇人聽廣東歌,其實都係環境所造成……

任何嘢都有佢紅嘅原因同可取之處,我哋好應該汲取別人嘅優點化為己用。K-pop表面睇就如你所見咁簡單,但人哋背後花嘅努力,你唔去深入了解,係唔會明白……

下一頁:「千祈唔好帶女朋友去韓國玩鐵道自行車⋯⋯」