其實講到男星集郵,一班地勤姊妹都有唔少故仔──平時八卦雜誌淨係講名人坐飛機嘅怪行,其實單係櫃枱Check-in,都可以反映到巨星嘅性格,因為人人都無可避免要同地勤接觸交流,聽班姊妹講到興高采烈,原來佢哋本集郵簿都拍得住芷珊姐姐,搞到我忍唔住勁講:「乜佢哋真係咁㗎?」

撰文:杜遊珍|圖片來源:《東方新地》

小齊金句 ── 「唔雞晒!」

就算明星Check-in親力親為,但有無得臉對臉接觸,都好視乎彩數──好似勁 Like 任賢齊的姊妹J就話,有次睇住小齊明明朝自己方向邁進,居然畀隔籬位男同事截糊,J惟有邊做嘢邊豎起耳仔偷聽小齊真人發聲,最後只係聽到佢講咗一句:「唔雞晒」。事隔多年,姊妹J最近睇電視,發覺小齊講廣東話依然無乜進步,依然咁 Cute……!

yyc_airport

發哥 ── 魅力迫人!

cyf_2010
近年發哥比較少出現於機場,反而常常於香港郊區,觀塘九龍城等平民地段被市民捕獲!

發哥係 Superstar毋須多講,有次 Check-in排喺姊妹L條隊,現場霎時引起小騷動,首先失控的竟然係排頭位的商務艙洋人乘客,興奮到狂問姊妹L識唔識發哥,L心諗:「我細細個睇許文強大,當然識啦!」之後發哥仲相當nice咁跟洋人吹陣水先離開,但最爆笑係 L話翌日喺娛樂版見到發哥見報,張相咁啱影到佢於 Counter 工作中,變相合照,勁開心!

T1

梁家輝 ── 勁Gentleman!

lkf
有雜誌曾經喺機場影過梁家輝,當時佢離開吸煙室時,見外籍洋婦拉住行李,主動幫佢頂住道門,勁Gentlemen!(圖片來源:《東方新地》)

姊妹Y入行四年,都算閱人無數,講起梁家輝,忍唔住勁讚係「超級好男人」,話說有次影帝同太太一齊Check-in,地勤要將佢哋行李拎上磅,梁生竟然第一個撲出嚟,仲話:「呢啲嘢梗係男人做!」如此有禮貌的乘客,咪話明星,一般搭客都習慣繑埋手好少理,難怪姊妹Y印象難忘。點知故事未完:「檢查佢證件時,張相竟然係呂奇造型,我即翻轉張相忍笑,點知一抬頭,佢竟然笑瞇瞇望住等我反應!」又細心又風趣,唔怪得知姊妹們咁冧。 lkf_2010