最近,最熱爆嘅話題一定係《延禧攻略》,就算你冇睇過,網上亦有好多討論,一定會被周圍嘅人令你知道呢套係乜類型嘅劇集。

起初我以為有女神陳研希,睇下套劇點樣攻略佢,但睇完幾集發現,根本冇佢份做……

圖片來源:官方劇照、截圖

到底咩原因令《延禧攻略》脫穎而出?

不過,由於老婆嚷住要睇,嫌香港唔夠快,仲上網睇番大陸版,每當聽到高貴妃喺度唱粵曲表達自己內心世界時,我都會毛管棟。

好多人都話:「唓!咪又係勾心鬥角劇!睇到悶啦!」今次先放下成見,不討論《延禧攻略》值唔值得睇,高質定係低質。一套劇集咁多人追捧,一定有佢嘅優點所在。

以下幾個元素,就解釋到點解《延禧攻略》可以脫穎而出,咁多人討論!

延禧攻略
女主角與傅恒的一段情,又成為了多少觀眾心中的遺憾呢?

01 | 宮廷式「韓劇」

韓劇永遠離不開一個天下無敵高富帥,苦苦追求平凡女主角。好多人以為韓劇咁多人睇,係因為男主角「高富帥」,但其實唔係(相信冇人覺得乾隆皇帝好靚仔)。

韓劇真正受歡迎嘅原因,係女人特別鍾意睇「我可以改變一個男人」嘅劇情。包括《格雷的五十道陰影》都一樣,好多人鍾意睇,亦好多人完全唔鍾意睇……

呢類「改變男人」劇情,都係女主角會經常做出一啲越軌行為,挑戰男主角定下嘅規矩,最後男主角漸漸因為女主角而改變。

延禧攻略
韓劇真正受歡迎嘅原因,係女人特別鍾意睇「我可以改變一個男人」嘅劇情。

02 | 女性的權力遊戲

《延禧攻略》再加入妃嬪爭權,令女性觀眾睇到咬牙切齒。韓劇屬於「代入型」劇集,好多女性觀眾都會代入平凡嘅女主角,被天下無敵男主角萬般寵幸。

而《延禧攻略》則相反,相信好少人會將自己代入某一個妃嬪入面。但《延禧攻略》亦hit中另一個女性特點,就係「八卦」。好似辦公室權力鬥爭咁,即使冇被捲入事情,都好想作為旁觀者食花生。

延禧攻略
劇中多個妃嬪日鬥夜鬥,每集都提供大量花生。

03 | 簡單易明

權力鬥爭劇情唔算創新,點解《延禧攻略》會多人睇?話說我每晚對住電腦工作,老婆就喺我旁邊睇《延禧攻略》,只需要聽到配樂,已經知道當時劇情發生緊咩事。

揭發奸妃陰謀、宮女日常耍鬧、愛情憂傷劇情、生葬五阿哥……幾乎每次出現嘅陰謀嫁禍都有公式,背景配樂亦一樣,絕對唔會睇到有「嘩!原來呢條友咁奸,真係估你唔到!」

延禧攻略
呢種黑白分明、簡單易明嘅劇情亦係《延禧攻略》受歡迎原因之一。

總結:

正所謂百貨應百客,我哋唔應該用「簡單」、「深奧」嚟分辨一套創作高質定低質。

睇劇集只係公餘娛樂,放工返到屋企,可以放空個腦,接受簡單直接嘅刺激,都唔係一件壞事。

延禧攻略

下一頁:影婚紗相就係影婚紗同影新娘,新郎只係布景板