世上應該只有日本 打工仔 最明白香港上班族,朝早等極都上唔到港鐵的慘況。東京有世界第一擠迫混雜的鐵路系統,日本 打工仔 為了迫上朝早滿員列車的兇悍程度,完全超出想像! 作為唔趕時間的遊客,我盡量唔會在東京晨早繁忙時間坐地鐵,不過有時趕長途巴士、飛機就避無可避,試過朝早9點在東京巢鴨想坐三田線去大手町,等足一個鐘都上唔到車,就知道即使肉赤,有時也要花大錢坐的士。

真係慳到一程的士都唔想搭,就要知道東京有邊幾條地鐵線是達到地獄級數,盡量避開唔好搭。國土交通省每年都會就「東京圏主要區間混雜率」做統計,混雜率分成5個程度︰

100% 定員乘車,可靠柱站立,手握吊環及扶手

150% 擠迫,但仍有裕餘可看報紙

180% 擠迫,只可看到摺起的報紙

200% 相當程度的壓迫感,如果要閱讀的話,雜誌之類可能勉強讀到

250% 連手都動不了,身體只可隨電車晃動

據日本 打工仔 講︰混雜率180%以上,基本上係以腳尖站立,睇報紙?發夢啦﹗

關東地區合共有84條路線,一直以為最擠迫的山手線,竟然連前20名都入唔到!

#第1位:混雜率199% JR総武線(緩行) 錦糸町駅 → 両国駅

繁忙時間 7:34am-8:34am

#第2位:混雜率199% 東西線 木場駅 → 門前仲町駅

繁忙時間 7:50am-8:50am

#第3位:混雜率193% JR橫須賀線 武藏小杉 →西大井

繁忙時間 7:26am-8:26am

通勤型電車平時每卡載客量大約150人,朝早化身廝殺列車載客量多一倍,一班車粗略估計約3,000人!

在東京通勤的 打工仔 ,搭車時間外,最少要多預30分鐘來等車,京濱急行電鐵更為此推出朝早繁忙時間座席保證列車「モーニング・ウィング号」,上班族只要畀多300円就一定有位坐。原來關西最繁忙的路線是大阪地下鐵御堂筋線,由梅田至淀屋橋,混雜率只係150%,即係話︰擠迫,但仍有裕餘可看報紙,難怪東京打工仔聽到都一臉羨慕!