搭飛機想 upgrade ,坊間傳聞不外乎着靚少少、早啲去check-in等。不過最近香港航空同國泰航空都各自推出咗 upgrade promotion,GOtrip編輯部今次仲向兩間航空公司查證,千真萬確,唔好再在check-in櫃位話自己生日、啱啱結婚去honeymoon喇!

香港航空:Online check-in隨時獲升等


廚叉(HX)1個月前在facebook出過一個post,話原來乘客只要在港航個app或者網頁做online check-in,就有機會可以免費升級至商務艙!!!

編輯部向香港航空查詢,公關小姐話今次呢個campaign係千真萬確免費 upgrade 畀乘客嘅,而且冇附帶條件,只要上網做online check-in就得!雖然不少網民都在facebook留言話港航個網勁難做online check-in,又只對應部分手機介面,不過3星期前HX再出post,力證free upgrade 成功的乘客得獎相片。

公關回應:暑假期間都upgrade得到!

問番港航公關部,佢哋話最初個 upgrade 活動預算做到8月8日,但現在並沒有落實幾時完,暑假期間都仲有,而且每日都有幸運兒。加上由只限長途機延伸至台北、曼谷等短途都有機會,想免費坐商務艙,今個暑假搭港航記得做online check-in喇!

國泰航空:暗盤出價博 upgrade

因航最近relaunch多年前曾經推出、畀乘客暗盤出價競投 upgrade 嘅「智選升級」服務,呢個並唔係免費 upgrade 嘅辦法,而係要真金白銀畀錢競投,目的當然是填滿啲premium econ同商務機位,咁即係意味着免費 upgrade 呢支歌仔就嚟變成絕響!

暗盤upgrade係咩玩法?其實呢,upgrade bid 並唔係新鮮事,不少外國航空公司例如新加坡航空、德國漢莎、加拿大航空等都有,畀乘客出發前以一個心儀又平過直接買premium econ/ business機票嘅價錢,獲得高級的服務,又可以畀航空公司賺多啲,win-win situation嚟嘅!

臨出發成功中標! 埋單平足三分一

記得幾年前國泰都有類似暗盤價競投 upgrade,行家S喺網上訂國泰機票,填信用卡資料畀錢時,彈出一個暗盤競投選項,提示可用$1,000-$3,000 逐程 upgrade,出發前收到e-mail通知成功,結果埋單$6,000 就可以坐商務來回首爾,平足三分一有多!

升級航點 包括歐亞中東

咁今次「智選升級」又係點玩法?根據國泰網頁,現時可以出價 upgrade 嘅航點包括:阿德萊德、阿姆斯特丹、曼谷、布里斯班、宿霧、清邁、芝加哥、科倫坡、峇里、杜拜、加德滿都、羅馬及首爾,日本、台灣都冇份!

在官網買機票時,又或者買完機票後登入網站,甚或特選乘客會收到電郵邀請,於出發前7日或之前都可以暗盤落標,出價時要連埋信用卡資料,至出發前2天會收到電郵通知是否成功,不成功不收費,成功就會立即過數,順利upgrade。

落bid前注意!只能升一級!

記住!Upgrade玩法只限1 level up!即係如果你買經濟,就只可以bid特選經濟(PEY);如果你買的機票是PEY,先可以暗投商務客位,架機如果冇PEY,係可以直上business class!但係行李限額、可儲的里數同原本畀錢買的機票等級相同,至於機場lounge就只有up上商務的乘客才可享用。

下一頁:地勤解說!機票Upgrade之謎!