之前分享過 「坐飛機經濟變商務  」話題。想補充一下,彩數歸彩數,以我多次成功在經濟艙打橫嚟瞓如 商務 艙經驗之談,以下3招係真心work嘅,雖未至於萬無一失,但成功率都相當之高。至於有人以殘體字控訴我教壞港人唔守規矩,我在此呼籲,以下動作以不騷擾到其他乘客為前提。對腳唔好隊出走廊、唔好全程挨後是常識吧!

你同我講規矩!?你學識排隊先啦!今次一於開心share攻略,等你飛得招積坐得舒適!

第一,盡量揀後排

通常一般心急客人都會揀最前面,地勤人員亦會盡量填滿前排先,所以打後行數吉位會較多。唔信你搵次行去最後睇睇!網友的溫馨提示都係正確嘅,如果你online check-in時見到後排有一大lot座位已mark,九成九係旅行團,呢班未出發先興奮的團友們通常嘈爆,咁嘅情況就要迴避喇!

第二,必揀中間走廊位

窗口位不嬲搶手,所以成行都冇人坐的機會微乎其微。緊急出口位可以伸直雙腳,不過兩邊扶手係梗局,部分座位甚至唔可以挨後。留意番最前排中間係嬰兒床位,而最最最中間呢,左右護法保證你成程機唔使旨意郁,記得走廊位才是王道。

第三,調位要快狠準

其實當你見到空姐開始閂overhead locker,機長廣播又開始的時候,正常情況代表客人已上齊,未起飛都可以開始調位喇!記得將安全帶扣好,放在毛氈上面先好瞓著,否則每次氣流都預咗有空姐招呼你。而且,如果你order咗特別餐,調位請早揚聲。

最後,成功機會當然睇彩數,班機full唔full load好視乎目的地及航空公司。試過搭日航難得地少乘客,又奸計得逞。坐因航的話,基本上可以放棄。機組人員見你調位其實like唔 like?空姐朋友稱:「你瞓著我做少個客都不知幾好!」放心,成功爭取連位嘅朋友請瞓低~