睇臉書,果然能知天下事。早幾日朋友個朋友出po控訴:「半個月前飛大阪先知道國泰原來會特別處理 Rimowa 的行李篋,點知今日由香港飛台北,行李篋就被摔破了,國泰你是怎樣處理 Rimowa 行李篋的?」去旅行遇着行李毀壞確實慘慘豬,不過我更好奇是所謂的特別處理究竟有幾特別呢?

text: B.WAN (原文刊自《新假期》917期)

01|篋神=易碎物品?

根據當事人D小姐以及不少最近搭國泰的篋神用家朋友所述,原來國泰的speical care就是check-in時在行李篋掛上「Fragile」的吊牌,再交到大型行李櫃枱寄艙,同其他oversized行李及BB車為伴,而非平日般check-in時直接放上輸送帶託運。打聽過現職國泰地勤的員工,新措施3月中才實施,雖然有關方面並沒有正式公佈,但新指引話所有 Rimowa 都要掛「易碎Fragile」牌,希望處理行李的人會小心啲。雖然篋神獲得厚待,但D小姐個篋都係爛咗囉!

D小姐的行李掛了Fragile牌都被掟爛,唔嬲就假!(圖片來源:facebook截圖)
D小姐的行李掛了「Fragile」牌都被掟爛,唔嬲就假!(圖片來源:facebook截圖)

gossip_rimowa_02
篋神加上「Fragile」 tag後,仲要有專車接送上機。(圖片來源:Flyertalk)

(編按:4月10日更新--CX「厚待」Rimowa的訊息經傳媒轉載報道後,國泰內部再出新通告,表示撤回特別措施,職員只要為行李貼上普通行李牌就可以,無須特別「關注」!)

Cathay_suitcases_UTurn
《南華早報》以U-turn形容國泰內部指引急轉彎,據報航空公司曾與Rimowa生產方商討交代事件。

02|篋神=有爛即場換?

你可能問:「點解得 Rimowa 先有?家陣係咪差別待遇先?」嗱,叫得做篋神都因為多人熱捧,再加上價錢昂貴,用家自然錫住用。有業內人士推測過往有太多人因為外殼刮花、撞凹等問題而提出索償,導致航空公司出此下策。江湖有傳國泰行李服務櫃枱放定一大堆新篋神,有朋友就試過行李篋損毀太嚴重而即場獲贈新篋1個,仲要係相同的型號,當中唔排除有人渾水摸魚,專登攞個爛篋博賠償,莫非就係咁使大咗條數要出招止血?

gossip_rimowa_06
據用家的非正式統計,金屬篋一係唔爛,一係就勁爛!(圖片來源:網上圖片)

03|篋神=仇富陰謀論?

地勤朋友再爆料,的確不少處理行李的員工都特別憎恨篋神。「你咁硬淨,就掟俾你睇!」篋紅果然是非多,回顧過去,篋神久不久就見報,最經典是幾年前有資深旅遊領隊因為心理障礙,對篋神有特殊癡戀,9個月內在行李領取大堂合共偷取12個篋神返屋企!亦有傳聞指事情與航空公司無關,只係不同機場的行李部機組人員都有「仇富心態」,見到貴篋就忍唔住粗暴對待,孰真孰假好難證實,但強國曾經就有報道話:「碰到中國的機場員工,篋神就是會壞!」代理更稱傷亡報修名單有9成來自首都機場,唔⋯⋯篋神用家們出入北京記得用紅白藍好嘞!

行李入籠又點,最後都係人手處理,避免唔到層層疊壓住個篋!(圖片來源:Gettyimages)
行李入籠又點,最後都係人手處理,避免唔到層層疊壓住個篋!(圖片來源:Gettyimages)

04|篋神=高科技尖端?

雖然傳聞多多,去年被LVMH收購後仲越賣越貴,但篋神又確實有一手,率先推出具有電子標籤託運功能的型號,只要連結航空公司及品牌的手機app,透過篋上的電子標籤就可在家中完成託運行李程序,減省平日在機場check-in時,用人手處理磅重、印製及貼上行李標籤的時間,但問題是這項高科技功能受制於航空公司同機場的相關設施,目前只得篋神同鄉德國漢莎同長榮用得着,未知CX下一步會唔會諗住配合呢?

電子行李帶可連接app,追蹤行李位置,又不用貼貼紙,既環保又快捷!(圖片來源:Rimowa)
電子行李帶可連接app,追蹤行李位置,又不用貼貼紙,既環保又快捷!(圖片來源:Rimowa)