話咁快又到畢業生搵工季節!話說近排有唔少讀者朋友問我有關空服員招聘、 空姐面試 等問題。一般而言,航空公司面試會分為小組、單獨面試兩大部分,要先成功通過小組面試,先有機會去單獨面試 (final interview),所以如何在小組面試中脫穎而出,就係你 空姐面試 嘅第一考慮喇!

留意番,我呢篇文唔係想同大家預測到底面試會出咩題目,因為 空姐面試 要注意嘅嘢,根本唔係你答題答得有幾好,而係好多你冇諗過 interviewer 會留意嘅細節,例如係面部表情、言行舉止。想喺小組面試中脫穎而出?就要學好以下貼士!

01)長期微笑,謙卑有禮

其實小組討論入面一般都有起碼十個人,每人根本唔會有太多時間發言,咁interviewer係點淘汰考生嘅呢?就係你嘅面部表情!謹記,無論任何時候,你必須保持微笑。回想我當日投考空服員時,有考生於辯論環節中攻擊我嘅論點,但我都繼續微笑點頭(巧妙展現你的聆聽技巧),再有禮貌地回應攻擊,最後攻擊我嗰位考生被淘汰了!可見被人攻擊唔緊要,最緊要係你如何應對!

02)避免做強勢領導者

如果你係去應徵做 team leader、經理,你絕對需要表現出你嘅領導才能;但相反,空服員日常工作講求嘅係團隊精神,航空公司需要嘅唔係領導者,所以 interviewer 係會偏向淘汰一啲太過強勢嘅考生。所以記得唔好喺小組討論中 dominant,以為可以攞多幾分,反而要表現出你係一個非常容易與人合作嘅 team player~

03)嘗試協助弱者

承接上一點,要表現出自己係一個好嘅 team player,除咗唔應該 dominant 之外,更成功嘅就係主動去幫助一啲需要別人幫助嘅人,例如喺小組討論入面可能會有一兩個考生唔夠主動、冇機會發言,你可以喺發言最後加句說話,邀請一啲未開口講過嘢嘅考生發言,又或者可以喺言語上幫一啲講嘢講到離晒題嘅考生,令到整個討論有效、成功,呢啲都係你攞印象分嘅好機會。

04)記清楚組員名字

其實 interviewer 會睇一啲好細微嘅嘢,除咗你嘅面部表情之外,你會唔會記得你組員啲英文名?呢個都會係佢哋 judge 考生嘅一點。所以面試時,不妨同你嘅組員傾下偈,了解下,做個朋友,唔好視對方為勁敵,present 時候用名去 address 組員,都可以 impress 到 interviewer 㗎!

05)Present時候以團隊角度出發

部分航空公司嘅小組討論環節裡面,係會有 group presentation 環節,每人都會有時間發言。請謹記,發言時候應該多講「we think」、「our group thinks」,論點應以團隊名義出發,等 interviewer 知道你唔係獨行俠,係一個有團隊精神嘅 good teammate。

小總結&最後提示:

小組討論貼士大概就係咁~ 其實好簡單,面試就係要說服 interviewer, 你係勝任呢份工,你試諗下,空服員嘅工作就係要對客笑,要有禮貌,要同唔同國籍、年齡、職級嘅同事合作,所以你必須係一個 good team player,當然有禮貌都好重要。另外,多啲留意航空業、航空公司歷史、旅遊新聞等都有助面試!下次有機會再分享單獨面試應徵技巧啦~ 拜拜。

IMG-20160312-WA0019

也想說的是,條條大路通羅馬嘅,萬一失敗了,不用灰心,再接再厲,總有出頭天!要加油喔~

下一頁:單獨面試( final interview 心得篇)


Btw, 感謝讀者支持,我個 page 開咗唔夠三個月已衝破 4,000 likes…… 要繼續支持我啊!❤

fb: 兼職空姐姥姥