喺飛機上面買免稅品就好似吸煙或者飲酒呢類個人習慣咁,試過嘅人可能會有鋪癮,但係未試過嘅人就可能一世都唔會去試咁。一班航班上面平均三百個客,每班機會買嘢嘅乘客可能都不過十個八個。事實上,我身邊好多好多朋友雖然成日搭飛機,但係從來未試過喺機上買免稅品。咁不如今日就講下關於機上免稅品,等大部分冇乜經驗嘅人可以了解多少少啦!

空少解答 機上免稅品的4大謎思

謎思1 | 點解落咗order,但係好似要等咁耐先至有人嚟賣?

通常賣免稅品(行內人俗稱賣bar)主要係由航班上其中一位機艙服務員負責,只有嗰位特定嘅同事持有存貨櫃嘅鎖匙。
正常航空公司(廉航除外)理論上所有機艙服務員嘅首要職責都係確保乘客飛行安全,然後就到提供機上餐飲服務,跟住最後先到其他職責例如售賣免稅品。

所以通常嗰位特定同事要喺餐飲服務後,先至有時間嚟賣嘢。但某啲銷情通常比較熱烈嘅航線如北京、上海,航空公司可能會安排一個額外人手只負責售賣免稅品,喺呢類航班上,通常都可以快手啲買到你想買嘅嘢。

謎思2 | 點解好似成日都冇貨咁嘅?

飛機上面始終有負重限制,總唔能夠為咗擺多啲貨就載少幾個客嘛!所以同款嘅產品數量通常都係一件起兩件止,所有嘢都係先到先得,售完即止。
仲有一個殘酷真相,就係飛機上面嘅免稅品只會喺航空公司根據地度補貨。舉個例子,如果你係搭一間香港嘅航空公司去日本,咁喺香港出發飛去日本呢一程就會貨源充足,但係去到日本之後,免稅品就唔似得其他消耗品如飛機餐呀、果汁汽水咁,可以隨便喺外地補貨。

因此,呢架飛機嚟嘅時候賣剩幾多貨,就會係日本飛去香港呢一程機嘅乘客可以買嘅貨量喇!如果冇貨點算?一係可以落機去第二度買,再唔係,其實好多航空公司都有預購服務可以畀你落定order,上機攞貨,咁就唔使怕冇貨啦~

謎思3 | 免稅品係咪真係平啲呢?

呢個問題係好多人都好想知嘅。其實香港都冇打消費稅,大部分機上嘅免稅品本來喺香港買都唔使畀稅,咁平唔平,就真係好視乎出面賣緊幾錢同埋飛機上面有冇做折扣。
舉例,有一啲嘅護膚品會有免稅市場獨家嘅包裝,可能比起平時個容量會多少少,連埋折扣,咁都會平過喺出面買,但真係好難一概而論。

建議如果有shopping list嘅話,不妨格下價,不宜迷信免稅品一定平過喺街邊買。至於烈酒同煙草產品呢啲打重稅嘅產品就真係好平。可惜兩者入境通常都有數量限制,買之前記住留意番,如果唔係入境被人罰重稅就會倒蝕喇~

關於入境香港的應課稅品可以參考官方網址。

謎思4 | 畀卡定係畀現金?

好多時喺飛機上面買免稅品就係想清埋啲外幣,如果你目的係咁就梗係畀現金。不過要注意番兩點:
1) 未必所有航空公司都會收外幣,所以記住問清楚空中服務員。
2) 如果需要找續,找續貨幣都未必有好多選擇,因為有啲航空公司唔會提供找續用嘅散紙畀空中服務員,所以找續嘅貨幣來源,完全係取決於負責嘅同事帶咗幾多散紙喺身,還望各位乘客諒解。

其實,如果怕麻煩唔想找續,都可以考慮部分畀現金,餘數畀信用卡呢個選項。當然,如果想用信用卡,付款嘅時候都有嘢要注意,例如最低消費額係幾多先可以碌卡、可以用邊種貨幣結算同埋匯率係幾多。

最後就係想分享下個人經驗,並唔係每一間銀行發嘅銀聯卡都能夠輕易被認證,所以最好帶備多一至兩張唔同信用卡公司嘅卡做後備啦!

小心轉機被沒收!買免稅品前要問清楚

其實喺機上買免稅品都仲有好多唔同嘅嘢要留意,例如,如果你要轉機嘅話,買液體、啫喱狀免稅品就要特別留心,因為根據某啲機場或者目的地需要,乘客上機前都可能要再進行安全檢查,就算係喺上一程飛機上面新鮮買入嘅免稅品,可能都會被檢查人員沒收呀!

我試過有一次係香港轉機去澳洲嘅乘客就被人沒收咗支新買嘅威士忌喇!可憐佢只可以喺我嗰程機度再買多一次。
希望你睇完我呢個簡單嘅介紹,下次都會想試下喺我嘅航班上幫襯下我買免稅品啦!

延伸閱讀:空姐流言終結 | 再問我反枱!9 句 空姐 聽完會反白眼的說話

延伸閱讀:空姐福利 | 1折機票 的謎思: 不要再問我拿平機票了!