做我哋呢行,三日唔埋兩日就要出門一次,逐次執行李都真係好花時間。如果話飛短途機去酒店過一晚夜的話,隨便帶一套換洗衣服就可以。但係要飛長途嘅話,我個大喼入面長期都會準備好以下8大長途機隨身小物,今日同大家分享我出遠門嘅standard loading。

8大長途機隨身小物

01 | 全球通用Wi-Fi蛋

喺呢個冇網上就好似世界末日咁嘅年代,飛之前一定要諗定去到外地要點樣上網。好多同事都會有好幾個國家嘅SIM卡。市面上,其實已經有好幾款可以支援多國使用嘅Wi-Fi蛋或者SIM卡,我自己就用緊一款支援70個國家/地區嘅Wi-Fi蛋。增值六蚊美金就可以有1GB data,如果唔用嚟睇video,整嚟開Google Maps搵下路或者碌下Instagram同facebook,都夠用好幾轉長途機喇!

如果預咗自己需要大量使用數據仲可以買day-pass,同樣六蚊美金一日任用。好處係唔使換卡同埋都可以share畀人一齊用,加上佢開「行」咗都會發出熱力,有啲同事仲攞嚟當暖蛋用添 〜

02 | 迷你電熱水壺

成日都聽好多都市傳說,講到好多冇公德心嘅人會用酒店電熱水壺嚟「煲內衣褲」,搞到我哋都唔敢亂咁用酒店個公家壺,惟有準備個私家壺。市面上有種可摺疊式嘅旅行裝水壺,摺起咗都算輕巧慳位,唔錯呀!

03 | 私家拖鞋

講起酒店公家嘢仲有拖鞋。有啲酒店人員爆料話佢哋嘅拖鞋係唔會洗嘅!雖然都有即棄式嘅拖鞋,但係好似唔係太環保,都係帶番對私伙嘢穩陣啲。你話唔著?唔好制呀!塊地氈分分鐘仲老過你呀!

04 | 褪黑素片

有時去到時差大嘅地方,唔係咁容易瞓得好同瞓得著。怕食安眠藥太傷身,可以考慮下去買褪黑素片。佢聲稱係補充劑,褪黑素都係人體會自然產生嘅激素,但係有冇效都係好視乎個人體質(戴定頭盔先)。有啲同事食3+就夠,有啲同事就話食到10+都冇乜用。個人經驗分享係,食完之後通常起碼都會瞓到兩個零鐘熟睡,之後再繼續瞓唔瞓到落去就真係睇彩數。不過好處係食完佢瞓,唔會有安眠藥嗰種「wing wing哋」嘅感覺。

05 | USB放濕器

唔知點解,好多酒店房都好乾,尤其係有暖氣嗰啲房間,成日瞓到半夜都會喉嚨乾到醒咗。只要喺床頭位開住個放濕器瞓,就可以改善呢個問題。我用緊一隻球狀可以代替支裝水樽蓋嘅款式,基本上有水樽或者水杯都可以用嚟放濕,幾方便!

06 | 潤唇膏

承上題,除咗喺酒店房會好乾,其實喺飛機上面都好乾。飛十個八個鐘,唔搽定潤唇膏,通常嘴唇就會甩晒皮,所以要記住唔好check-in咗支潤唇膏呀!

07 | Heattech/保暖功能內衣

外國有好多地方,即使係夏天,日夜溫差都差好多。為咗唔想帶太多件外套咁阻地方,我通常會帶定保暖內衣,夜晚凍嘅時候先著喺入面打底。唔使再帶一件外套出街,又唔使諗佢襯唔襯原本嗰套衫咁煩。

08 | 紙底褲

正所謂「天氣不似預期」,有時行程可以因為好多唔同理由而受到阻滯,好似紐約冬天成日會暴風雪飛唔到,或者香港打風機場運作唔到。滯留喺外地,最怕就係唔夠換洗嘅內衣褲。唔通真係正面著完反轉再著過咩?啲細菌都有穿透力嘛!紙底褲質感差就差少少,但係起碼衛生啲先啦!帶定少少未雨綢繆冇死錯人嘅。

下一頁:空姐教路|避免jet lag、帶漏保濕 機艙護膚4大急救妙法