【香港航空】香港航空商務客位一向抵搭,最近更推出全新A350空中巴士商務艙,成為旗下最闊落的機位,機上娛樂都全面升級。9月份起,20架A350將陸續推出市面,長短線都有機會坐,短短哋飛曼谷都有得搭!

撰文:Elam|圖片:Day

香港航空 A350全新商務機位

每架A350都配備33張曾獲選為世界最佳商務艙座椅之一的「Super Diamond」座椅,以1-2-1反魚骨式布局,每個座位都有獨立通道,出入不怕阻到人。

將有20架A350空中巴士客機啟航。

商務艙以 1-2-1反魚骨布局。

最闊落商務客位

座位可調至180度平躺角度,成為睡床。比起現有的商務客位,睡床更闊落和長身。由闊23吋增至26吋,長76吋改為78吋,瞓得更鬆動,就算身高1米9都夠位瞓。

座椅物料也來個革新,枕頭位置採用天然皮革,座椅布料亦採用柔軟針織布,最重要是抹去了傳統的「福」字設計,擺脫土氣。

可自行調校椅背、腰間和腳部各個位置的角度。

調校成睡床後,腳部位置仍然有點向下傾斜。

瞓上去,旁邊仍有空間可以郁動,攬多隻公仔瞓都冇問題。

全新機上娛樂系統

除了座椅設計,機上娛樂系統也全面升級,與法國航天公司Thales合作,開發全新的娛樂系統介面。17吋輕觸式屏幕,手指一掃,便可點選娛樂項目和玩遊戲等。座位旁亦配備一個貌似電話的「Air Mouse」,可以用作滑鼠或點選目錄之用,不用「烏」向前篤屏幕,啱晒懶人!

17吋輕觸式屏幕。

更可選擇在「Air Mouse」上播放電影,在機上都可以攞上手做低頭族,唔使坐定定望向前,就算點坐都睇到!

有多個儲物空間,方便放置隨身小物。

座位配置充電插頭,並可連接Wi-Fi。

免費旅行護理套裝。

精緻飛機餐

商務艙包空中小食和主餐,由本地80後名廚蔡家富和來自三藩市的名廚Chris Cosentino攜手合作,做得精緻。

商務艙餐單。

餐前小食。

主菜。

免費貴賓室

搭商務位另一重點是可以免費入貴賓室。貴賓室「邀堂」只准許香港航空乘客進入,毋須與其他航空公司共用,人流較少,而且隔絕大堂廣播,環境寧靜舒服。

入去已經是自助餐枱,炸物、點心、湯粉麵、即製雞蛋仔都有。最吸引是酒吧位,供應生啤、紅酒、白酒、雞尾酒等等,更可以要求bartender為你tailor-made一杯專屬cocktail,夠晒特別。

Cocktail。

美祿味雞蛋仔,外脆內軟。不過製作需時,5至35分鐘不等,視乎柯打數量。

個人休息空間

有時等飛機等得耐好眼瞓,貴賓室內都設有個人休息空間,放有6張貴妃椅,並免費提供蒸氣溫熱眼膜和毛氈,畀乘客叉足電。

個人休息空間。