話說我自己都係一個好怕麻煩到人哋嘅人。未入行做空少之前,搭飛機嗰時都會諗住盡量做個好手尾又獨立嘅好乘客,會做好多小動作,希望幫輕下空姐空少。後來做咗空少之後,先發現原來有一部分嘅行為,自己以前一直咁做都以為係幫到手,點知原來係幫倒忙就真。以下分享幾個不時會遇到乘客好心做壞事嘅例子。

好心做壞事系列

01 | 食完飛機餐後 疊高餐盤上嘅小盤子

唔知係咪喺酒樓、茶記食嘢食得多,以前會覺得食完嘢將啲兜仔碟仔整齊疊高會好方便人哋收嘢,後來先知原來咁樣做係做多咗。
因為飛機上面係用餐車收嘢,但係餐車入面係有晒間隔,如果太高嘅話,係會令到啲餐盤塞實晒。

好心做壞事4大例子|空少爆料:乘客太好手尾 做多咗啦!
所以食完之後,其實唔需要刻意再執盤入面嘅嘢,空姐點樣畀你,你就點樣畀番空姐就得喇!

好心做壞事4大例子|空少爆料:乘客太好手尾 做多咗啦!
如果想睇落去冇咁雜亂,可以學日本乘客咁,張開餐巾鋪喺上面都得。

02 | 自己收餐盤入廚房

以前會以為自己攞埋餐盤入廚房好似好有手尾,其實咁樣做,對於空服員嚟講係更加唔方便。
一來飛機上面人手未必好足夠,坐喺頭幾行嘅客人食完個餐嗰時,可能空姐空少仲派緊餐畀最後面嘅乘客,攞到個餐盤入廚房都未必有空閒嘅人手幫你收拾。
好心做壞事4大例子|空少爆料:乘客太好手尾 做多咗啦!
另一個情況係有人手喺廚房入面,但係好多乘客都自己攞餐盤入廚房,佢哋就會忙住喺廚房入面收拾乘客攞入嚟嘅嘢,其實變相係延遲咗空姐空少出去客艙收餐嘅時間。

好心做壞事4大例子|空少爆料:乘客太好手尾 做多咗啦!
其實諗番空姐空少點樣都會推架車出嚟,一定會經過所有乘客坐過嘅位置,自己攞番個盤畀佢哋都唔會幫到佢哋行少咗。

咁當然,如果有特別要求,例如想用洗手間或者需要用枱,都可以早少少畀番個餐盤空姐空少,點都好過用call light叫人收嘢咁麻煩到人嘅。

03 |  自己斟熱飲

可能好多時都覺得乜嘢都自己攞就唔會麻煩到人,但有一樣嘢,作為乘客係千祈唔應該自己攞!

好心做壞事4大例子|空少爆料:乘客太好手尾 做多咗啦!
嗰樣嘢就係熱飲喇!

有時啲乘客行過廚房見到部熱飲機,就會順手self-service。但係其實基於飛行安全考量,熱飲係應該由空中服務員喺乘客嘅座位上提供嘅。好多時乘客喺廚房叫完熱茶、咖啡或者熱水,都會話自己攞返去或者喺廚房飲得喇!但空姐空少都會話:「唔緊要,你返埋位先,我等陣會攞去你個位度喇!」

原因係,萬一乘客攞住杯熱飲喺機艙行走嗰時跌親,又或者突然有氣流,一個唔小心淥親自己或者其他人都唔好。

同埋,如果手上攞住熱飲就千祈唔好帶住你杯熱飲離開座位喇!如果你坐得太耐唔想咁快坐番埋位,不妨考慮下叫住凍飲先。

04 | 落機閂行李櫃

呢件事係所有手尾好嘅人都會好順手做嘅事。其實乘客落機之後,空姐空少係需要打開晒所有行李櫃門,檢查一次乘客有冇漏低任何物品。
如果你攞完自己嘅行李之後,空姐空少係好樂意你冇手尾一次嘅!

好心做壞事4大例子|空少爆料:乘客太好手尾 做多咗啦!
如果你想幫手閂櫃門,未起飛之前你見到行李櫃滿咗,我哋都會好樂意你順手閂一閂嘅!

時不時都會遇到有啲好好心嘅客人,佢哋話成日都會睇某啲航空公司秘密網,知道我哋呢行其實都有好多辛苦嘢或者難做嘅地方,所以冇咩事都唔想太麻煩到我哋嘅同事。其實乘客有呢種咁體諒嘅心意,我哋空服員已經好感動。
不過我哋出糧打份工,照顧乘客需要其實都係分內事,如果真係有需要,我相信專業嘅同事們係絕對唔會嫌麻煩㗎!
好心做壞事4大例子|空少爆料:乘客太好手尾 做多咗啦!

下一頁:空少專媾靚女乘客?空姐會被人摸屁股?空服員親歷4個被侮辱的瞬間……