有人鍾意一大班朋友一齊去旅行,雖然做搞手嗰個會好辛苦,但最後如果真係搞得成嘅話,成個旅程……呃……都會好辛苦的。

旅行方式有好多種 最緊要開心


當然,有人鍾意情侶兩個人去旅行,每次去完旅行,都好似了解對方多咗,感情亦好咗。回憶同相愛度,永遠都係成正比的。

又或者,有人鍾意自己一個人去旅行,我有個朋友,佢黐線到落機先喺當地機場上網訂酒店,乜都靠路在口邊,問酒店職員有咩景點,周圍問人點搭車去,見到鍾意嘅餐廳就入去食。

獨遊 VS 一班fans去旅行,各取所需!

中伏自己承受 最怕遇上……

單身上路,遇到任何中伏嘅行程都唔使驚,因為就算中伏都只有自己一個,唔需要向其他人負責任。無論邊種旅行方式,「旅行」本來就係一樣只要開心,就乜都得嘅活動。但以下幾種,以我個人嚟講就最討厭……

01 | 乞手信黨

有種人自己唔鍾意去旅行,剩係鍾意問人攞手信。佢唔熟各國特產,但只要被佢搵到香港有得賣,佢就會話你冇心不如唔好買。

對付呢種人,最好就係搵啲各國先有嘅特產,但又唔好送完自己激氣嘅手信畀佢。例如去奈良,可以買包餵鹿嘅餅乾畀佢做手信。

買多包餵鹿嘅餅乾,送畀不明情由、擘大喉嚨問手信的伸手黨,perfect match!

02 | 深度旅遊達人

有種人自以為係「深度」旅遊專家,除咗發掘一啲遊客唔會去嘅景點,仲會迫你去佢介紹嘅景點,否則,你就係「唔。識。去。旅。行」!你就係剩係識得食、玩、瞓嘅低級旅遊生物。

其實,我去旅行只係想完全離開工作,安安樂樂地食、玩、瞓……對付呢種人,你只好用激死佢嘅方式,堅持己見,覺得熱門景點no.1,佢介紹嘅完全不表興趣,讓其冇癮到盡頭!


「嗱!你應該去邊度邊度食呢樣嗰樣!」喂呀!我想唞下咋……阿達人拜託不要再說了…..(截圖:《魔戒》)

03 | 去幾日旅行可以講足一世

可能嗰次旅行對佢嚟講好深刻,每隔一段時間,佢就會好似失憶咁講番自己嘅旅行經歷,再攞番你已經睇過十幾次嘅相畀你睇。

要對付呢種人,長痛不如短痛,同佢講:「好靚啊啲相,求下你,send畀我返屋企慢慢J!」到佢下次再講旅遊經歷,先下手為強畀佢啲相佢自己睇,等佢冇癮。

懂得說故事的旅遊人令人喜愛,反反覆覆話當年就變成煩膠了!不要以為年輕時去過一次半次背包遊,就係《Lonely Planet》創辦人Tony Wheeler啦!

總結:去旅行係一樣為自己帶來「快樂回憶」嘅事,千祈唔好將自己嘅快樂,建築喺別人嘅痛苦之上。

下一頁:想坐得舒服就唔好坐 廉航 啦!