周不時都有人話搭長途飛機最怕遇到BB!藍橘子都話「飛機上有 BB 好可怕」!近日印度廉航IndiGo就率先推出「兒童靜音區 」,機上第1至4行、第11至14行列為禁止12歲以下幼童乘坐。唔少網民都贊成呢個措施嘅實行,但亦有家長希望其他乘客可以包容小朋友,大家又支唔支持?

支持禁細路:我都係想靜靜哋去到目的地啫


有網民表示,短途機都算,但長途機或者凌晨機,大家都希望可以好好休息下,遇到 BB 喊/細路嘈真係慘絕人寰!

都好,有時啲細路真係煩死人。

・而家又唔係唔畀BB搭飛機,只係為咗提升乘客嘅服務質素。我畀錢搭飛機要包埋聽BB聲十幾個鐘?

・BB 坐飛機 升降時耳仔唔舒服一定喊,BB狂喊唔停, 媽媽都會覺得嘈住人唔好意思,所以,如果我有BB, 我都會贊成。

・好好吖⋯⋯有時上機攰又頭痛想瞓,但細路喊聲⋯⋯真係考自己忍耐力。

・你有自由哭鬧,我有追求寧靜的權利,若父母已盡力,只能怨運氣欠佳。

跟進留言追擊--「問題其實出於部分家長太自私」!

我都勁憎啲人用細路仔係咁㗎啦嚟推卸責任!細路仔係咁,咁就由得佢?唔使教㗎喇?

・BB或小朋友喺公眾場合放聲哭鬧就大家都唔想,但每對父母係有責任事前去搵應對方法,而唔係由佢喊。

・有好多家長覺得細路控制唔到係冇問題,完全覺得自己冇責任。

・大人不是冇方法令小朋友靜下來,只是大人冇家教,老奉人哋應該包容佢啲小朋友。

・其實最需要被管嘅人係父母。

・啲人咁憎小朋友坐附近,咪就係因為啲怪獸家長唔約束啲細路尖叫踢椅背狂喊,人哋忍無可忍就話人哋唔包容,請你都包容下啲唔鍾意小朋友嘅乘客囉唔該。

反對一方-- 為小朋友平反!「嘈住乘客嘅另有其人」:

大人都有份嘈啦!唔止小朋友喎!

・上次嘈住我阿仔瞓覺嗰幾個大人又如何?

・嗰日去泰國,後面個阿叔大聲講嘢講足全程,反而隔籬個小朋友全程都瞓咗,應該禁邊個?

・我覺得BB嘈都冇法, 但有啲成年人⋯⋯咪仲嘈!

・有時大人都可以好嘈⋯⋯大開嗓門傾偈,小小事吵吵鬧鬧嗰啲又點計?

理性質疑:靜音區真係有用?

其實佢飛A320⋯⋯ 個細路要喊起上嚟,基本上全機都聽到⋯⋯..

・冇小朋友不等於靜音⋯⋯ 一班人講嘢大聲、瞓覺鼻鼾聲,呢啲一樣嘈,但你坐靜音區就會冇?

・靜音區=禁煙區,個細路喺第7行喊,第4行同第11行聽唔到㗎咩

・你坐第4行靜音區,但如果個B坐第5行,一樣嘈到拆天。

・其實隔幾行唔會好得好多,應該分機頭機尾。

・成架機得八行係靜音區,太少喇!有作用咩?不如唔好搞。

仲有其他訴求!網民提出創新建議:

凌晨機應該全機靜音囉唔該

  • ・最好有一區畀人校椅背,咁全部一齊校,就唔使被前面嗰個人迫住。
  • ・整埋個「不能拉後椅背」嘅廉航就好喇!
  • ・最好有個「喜歡講嘢人」區。
  • ・其實整個嬰兒專區咪仲好!我相信我哋呢啲做媽媽抱住個仔都想坐得闊落啲、自在啲。
  • ・不如推出瘦人區。

其實大家都只係想舒舒服服搭程飛機啫!分開坐都未必係壞事。始終冇小朋友嘅,未必明白家長嘅難處,而家長又唔使因為自己個BB失控而尷尬。至於成效方面,就要實行咗先知喇!