雖然我好鍾意去旅行,但係我唔鍾意搭飛機。

而我必須承認,討厭嘅主要原因有兩個,第一!係我作為男人老狗都好驚搭飛機……

我冇畏高,又唔驚玩機動遊戲,但唔知點解,就係好驚搭飛機,我成日都覺得,就算飛機有故障甚至失控,機長只會不斷安撫乘客當冇事發生,而唔會公布架飛機有幾大鑊……

而另一個令我討厭搭飛機嘅原因,係某部分乘客嘅乞人憎行為!!

我呢啲 cheap 精,幾乎每次去旅行都會選擇搭廉航。機艙座位與座位之間已經好迫好窄,通常我一上飛機,就會迫自己盡快瞓著,希望可以一覺瞓到落機,唔使心驚膽跳幾粒鐘。

但好可惜,每次我都被飛機起飛時強大離心力嚇到扎醒。而有一次,當我一擘大眼……喺距離我唔夠 10cm 嘅面前,見到前面座位嘅椅背!!

我當堂嚇到虎軀一震!乜起飛時唔係要將椅背拉番直嘅咩?點解前面條友會可以將個椅背拉到咁低?誇張到我連想起身都起唔到。

「你個椅背就嚟掂到我個鼻」

於是,我就同前面講:「唔該,可唔可以拉番高少少,你個椅背就嚟掂到我個鼻……」

但好可惜,因為前面條友塞住對耳聽歌,我叫佢,佢完全冇反應……
遇上呢種情況,最好就係搵空姐幫拖由佢做醜人。由於飛機正處於起飛中狀態,我揮咗好耐手,空姐先行到過嚟,佢望見咁嘅情況,首先對我溫柔一笑,再輕輕拍醒前面個乘客。

「先生唔好意思,麻煩你拉一拉高椅背。」
「點解?」前面條友除低耳罩。
「基於飛機起飛途中嘅安全理由,唔好意思~」

個男人聽話拉番高椅背,空姐亦有禮離開。點知,當飛機去到安全高度,乘客可以自由出入去廁所,我前面條友又再次將椅背拉低到我面前……我直頭隱約聞到佢陣頭油味啊大佬!

堅拒拉椅背「想舒服就唔好坐廉航啦!」

我惟有再次叫空姐過嚟解決……
點知今次個男人死都唔肯合作:「飛機都起飛完啦!點解唔可以拉低啊?」

「唔好意思,你咁樣會影響到其他乘客。」空姐。
男人企起身,擰轉頭望一望我,我向佢報以親切微笑,心諗:「係啊!你阻到我啊!」

男人坐番低,完全冇意慾拉番高椅背,仲塞番個耳筒話:「想舒服就唔好坐廉航啦!」

根據呢個男人講法,就好似坐巴士捽腳趾惹人側目,叫人唔滿意就坐的士一樣……

由於男人死都唔肯屈服,空姐無可奈何地同我講,由於班機滿座,已經安排唔到我調位,仲不停同我 say sorry。我當下完全無言,但又冇可能怪責個空姐,佢已經盡力協助。我亦唔想喺飛機入面大吵大罵,最後只好聞住男人嘅頭油味捱到降落……

飛機上有 BB 都好可怕

另外最令人討厭,但又冇得出聲嘅,就係飛機上有 BB 仔由上機喊到落機。
對於我呢種飛機熬底獸,精神長期處於恐慌狀態,個人特別躁底。但係 BB 仔要喊又真係控制唔到,佢一不爽就會喊,一喊就收唔到聲。但你又唔能夠投訴佢,因為 BB 仔意識唔到自己影響到其他人。

但有小部分不良家長,恃住「反正都控制唔到」,就對 BB 仔喊聲置之不理,可能佢哋平時聽慣已經視於無物,我試過見到有家長個 BB 仔一直喊,而佢就瞓得非常安詳,只係偶爾敷衍形式拍兩拍個BB仔安撫佢。

最後一樣,就係搭飛機會除鞋嘅人……

喂大佬啊!唔係話你對腳冇味就可以當眾除鞋呀!個觀感好核突啊!你自己就舒服,但有冇諗過坐你旁邊嗰個全程都望住你對腳,係咩感受啊?!

即係我都知坐頭等既舒服又有服務,但唔代表你坐廉航就可以周圍瀨屎同捽腳趾嘛!我明白要長時間處於飛機咁狹窄嘅環境,有好多事情都無法避免。但作為一個有教養、品德嘅人,應該喺任何情況下,都盡量唔好影響到其他人。

Tags :