「大三巴~觀音像~」睇怕呢首歌,遲啲都要加埋「摩天輪~」喇!因為新濠二期酒店「新濠影匯」10月27日揭幕後,大樓中間這座8字型摩天輪絕對會成為澳門新地標。這座台柱大作「影匯之星」號稱全球獨創,單是那8字型的設計、跨越30層樓的垂直高度,已足夠令酒店贏盡口水!早前媒體獲邀試玩摩天輪同其他設施,當然要率先跟大家報告下!

 

8字外型震撼吸睛

常言道澳門酒店一味賣大份、土豪味濃,但這個講法放在新濠似乎講唔通;講真若酒店一心拼房間數量,又點會大嘥到於大樓正中央架設一座幾乎佔去五份一建築面蹟的大龍鳳裝置?

macau_cotai_ferriswheel15

本來大家推想8字造型多數同賭場風水有關,不過負責督工的項目經理Fabio卻指一切只是美麗的誤會,原來大老闆何猶龍最初設想酒店外牆要有如「流星劃過」的耀目裝飾,工程師最初亦只係設計單圓摩天輪,奈何何公子覺得未夠瘋狂,幾經討論才決定多加一圈,成了今日的8字造型!

為了承擔「影匯之星」的重量,「新濠影匯」分為左右兩幢大樓,還要以孤型屏風樓的設計增加承重力;留意「影匯之星」共估去近四份一建築面積,真心揼本。

將咁重咁大型的機動設施鑲嵌係大廈中央,整座大樓的結構佈局都要重新諗過;又要平衡空間大小同經濟效益;當年淨係劃草圖評估可行性,都足足用咗半年!起初無人相信會建到,最後好彩係法國搵到一家生產過山車的公司承建整套系統!

圖解摩天輪車廂

macau_cotai_ferriswheel12

有別於一般摩天輪,「影匯之星」並無旋轉軸心,反而較似登山吊車般以巨型綱纜及滑輪帶動;升到最高處還可來一個「摘取流星」的自拍甫士。

摩天輪車廂每次可坐 10 人,只比昂平360 略細小小,4、5個人行行企企影埋相都唔會發生肢體碰撞。

另一個同昂平 360 相似的賣點就係一樣都有水晶玻璃地板,不過「影匯之星」架架車廂都有,唔使排餐懵。

酒店曾於面書專頁叫人競猜摩天輪的運行方向,現在終於揭盅;可惜好多網民期待嘅S型軌道…係無嘅,摩天輪只係逆時針行一圏。準確來講,應該叫花生型軌道先貼切。

「影匯之星」威水數據:

項目耗資:HK$25,600,000,000
籌備時間:3.5年

參與工人:約3,000人
施工修訂:重大修改18次、細節微調不計其數
離地最高:130m(38層樓高)
垂直跨度:15層樓
車廂數目:17個

飽覽路氹無敵景觀

macau_cotai_ferriswheel07

站在22樓登車平台,抬頭望,可以清楚見到錯綜複雜的鋼架、鋼纜,好在車外車內都沒有嚇人的運行聲響,不用嚇餐懵。

坐摩天輪,開心與否亦好視乎同車乘客,如果遇著個豪邁大叔,就認真大煞風景;人多,同樣有缺點,今次跟6人同坐,空間唔算逼,左右兩邊都有座椅。車廂內有冷氣、照明及緊急通話系統,運行期間沒有嚇人晃動,感覺穩妥可以放心玩。

macau_cotai_ferriswheel09
《新假期》記者Yuki

未到頂前,門口玻璃可俯瞰酒店花園和遠眺珠海,個view明顯比較好,另一邊大窗望澳門巨蛋與爛地,到頂時就比較開揚。所以若想在最高位成功爭取影Selfie,就要各人配合輪流影喇!

下一頁:摩天輪詳情&乘搭貼士

開幕優惠:住宿+摩天輪套票 每位 $849 起

夜景追加:官方唔會話你知的精彩夜景

講到尾,8字型摩天輪景觀唔算合格,因不少位都會有鋼架阻檔視線。反而每架車廂的兩格水晶玻璃地板更見驚喜,由最高點130米向下望,真係有少少腳仔軟!不少訂房套票有包玩摩天輪,值得試!

Tips:如果人少少想二人世界都可以要求,但人太多會建議6至10人同坐!要留意,車廂上落客時速度無收慢,如果想一次上齊人數上限的十位,就要快手快腳!另外門口位向西邊,正好望到日落位,較啱時間同BB豬來玩,都幾浪漫!

「影匯之星」資料:

車程:15-18分鐘
載客量:2至10人
軌道:逆時針花生型
開放時間:星期一至五 12pm-8pm、星期六及日 11am-9pm
門票:成人,每位HK$100、12歲以下兒童,每位HK$80;
             8字摩天輪+蝙蝠體感遊戲套票,每位HK$220

如何前往?

「影匯之星」位置喺正金沙城斜對面、毗鄰威尼斯及四季酒店,算是座落金光大道的中心旺地;坐的士去官也街也只需 5 分鐘車程。

 

文章原刊於《新假期》周刊,經GOtrip編採組修改及編輯

開幕優惠:住宿+摩天輪套票 每位 $849 起

夜景追加:官方唔會話你知的精彩夜景