來台中,不一定要攀山涉水翻阿里山日月潭,從機場搭半個鐘車,就可抵達台中市區搵食!這裡有齊夜市商圈café,卻不像台北擠滿遊客,來覓食唔使人迫人。但台中市餐廳小店分散,點揀好?畢竟胃容量有限,唔想浪費quota,就必讀今次覓食攻略!記者此行搜羅 10 家 台中美食 店 ,全部在網上擁有高人氣,更親自試過先推介,有品質保證,無論係呃like少女定大食友都總有款啱!

text:Elaine / photo:Wing / 原文:新假期周刊 875 期

01)  1 小時賣光!矜貴法國蛋糕

一早起身要做的事唔係食早餐,而係尋找台中現時最紅的甜品!CJSJ 蛋糕店剛開業 2 個月,已擁有超高人氣,買件蛋糕都要大排長龍!由兩位曾於巴黎 5 星酒店任職的夫妻主廚親自炮製,招牌水果蛋糕靚到似藝術品,記者於開店前 1 小時到訪,店外已大排長龍,更親眼目擊 150 件糕餅在 60 分鐘內被搶購一空!

台中美食
外形像真的佛手柑蛋糕,咬一啖已可食到外層煙燻香草醬,夾住糖漬佛手柑蜜餞,柑橘味清新微酸,食完再追加!
佛手柑 NT190/HK$45

營業時間:周二至周五 11am到售完;周六、日 12noon到售完
地址:台中市西區向上路一段 79 巷 72 號
交通:從台中火車站乘的士 10 分鐘

02) 食餐包 | 暢遊古宅

春丸是台灣本土食店,專製麵包,位於台中放送局內,是日冶時期遺留的歷史建築,政府去年就租予春丸作小店。春丸的招牌餐包,有 25 款餡料,如博多明太子芝士、靜岡抹茶紅豆、北海道牛奶等,全部日本入口。麵包亦非常講究,使用自培小麥種酵母、熊本皇冠麵粉,天天新鮮製造。

台中美食
套餐有餐包、炒蛋、田園沙律、果醬乳酪和奇異果醬梳打,即點即製。餐包的確鬆軟好吃,乳酪和飲品均採用自家製果醬,有天然水果的微甜度。
靜岡抹茶紅豆餐包套餐 NT 245/HK$59、單買價NT 35/HK$8

地址:台中市北區電台街 1 號
營業時間:10am-4:30pm
交通:從台中火車站乘的士 10 分鐘

03) 甜入心冰品推介 | 療癒力強 萌爆雪人冰

呢間仿日式甜品舖,門口棟住個粗眉雪人,從屏風格仔望入去,兩球堆疊的冰球扮雪人,食前倒入旁邊的燒仙草,呀!雪人徹底崩壞!記者即刻唔執輸照點,雪人上枱好打耳適合打卡,但我最期待都係摧毀佢嗰一刻!伴住花生、白玉、紅豆同仙草,口感豐富、甜蜜滋潤,仲要一啖凍一啖熱非常痛快!有得食、有得玩,少女大愛!

台中美食
自拍記得趁快,不然熱得冒煙燒仙草就會變果凍,無咗一冷一熱嘅口感,夾雜飽滿香甜的紅豆、酥脆花生、Q彈白玉,日式挫冰加入了台灣口味,層次Level Up!雪人刨冰 NT 80/HK$20

波屋Boru Boru

營業時間:星期一至五 12:30pm-8:30pm、星期六至日 11am-8:30pm
地址:台中市南屯區向上路三段 25 號
交通:從台中火車站乘的士 20 分鐘

04) 軟滑珍奶雪糕 配爆漿鯛魚燒!

台中是珍珠奶茶發源地,推介大家這間這間珍奶雪糕店!這店在FB有 2 萬幾個like,去到果然人頭湧湧!雪糕口味超多,有抹茶、芒果、木瓜奶等,但每日只供應 2 款口味,採訪當日是奶茶同榴槤味,軟雪糕夠滑,更可追加配料,有大堆波霸珍珠和爆漿鯛魚燒,勁足料!

台中美食
鯛魚燒抹茶味香濃,一咬開食到熱騰騰紅豆餡和Q彈白玉,沾著奶茶雪燃食,茶味大爆發!
珍珠奶茶雪糕加鯛魚燒 NT 140/HK$33

金帛霜淇淋專賣店

營業時間:1pm-9:30pm
地址:台中市北區三民路三段 201 巷 14 號

交通:從台中火車站乘的士 10 分鐘

05) 甘甜仙草抹茶刨冰 | 潮版日系涼粉

仙草即涼粉,有咩特別?這間仙草專賣店有近萬like,全因它的涼粉夠潮,像圖中這份仙草甜品,配有涼茶味刨冰清熱下火,而且味道甘香唔覺苦,更配有大量甜紅豆、抹茶雪糕和小碟凍芋圓,店舖走無印風,好好坐!

台中美食
明治抹茶嫩仙草雪花盛盆 NT 130/HK$30

神仙草專賣店

營業時間:1pm-9pm
地址:台中市北區健行路 690 號
交通:從台中火車站乘的士 15 分鐘

06) 撐本土小農!創意私房菜

主廚兼老闆上年開始設計法式無菜單料理,從在地小農搜購食材,加上極簡約的烹調提味,味道清爽,如海鯰魚採用蒸烤的煮法,保留了皮的膠質,;厚嫩豬扒用上原住民香料馬告和蘋果梨醬醃調,肉質鬆軟帶胡椒香。如此樸實味美,晚餐都不過$250!提提每晚只招待 20 人,事先訂座是必須的!

台中美食
馬高慢煮大里肌豬扒
表面平平無奇的豬扒其實最難煮,用 35 度慢火耐心烤熟,才能做到絲毫不乾不韌。面頭的馬高山胡椒微辛惹味,又加入蘋果梨醬醃過令其鬆軟咇汁,純樸好味!

07) 餐車發圍 ! 煙韌飯糰

流動早餐車「遊子飯糰」在西區擺賣,老闆正職做廚師,兩個月前開設「秘撈」餐車賣自製飯糰,希望讓大家吃到健康早餐。飯糰內餡是冬菇雞肉,調味只放少許鹽,再加入蒜菜來帶出食材鮮味。砂煲咁大個飯糰只賣港幣 12 蚊,卻可食到暖男滋味!餐廳逢周三至周日營業,會在誠品附近的兩個地點擺賣,食完可順道打書釘!

台中美食
淡紫色飯糰混合了圓糯米、長糯米、紫米和白米,有QQ口感,更以雞湯代清水煮飯,入口有淡淡雞肉香。
遊子雞肉飯糰 NT50/HK$12

遊子飯糰

地址一:台中市西區向上北路 138 號
營業時間:周六、日 10am-4pm
地址二:台中市西區英才路 460 號
營業時間:周三至五 7:30am-9:30am
交通:從台中火車站乘的士 10 分鐘

08) 比洪瑞珍更「台」 | $6 手作三文治

駛乜食洪瑞珍,台中也有間美誼三文治,開業兩個月已人氣急升,更有當地人專程駕車來買!3 款餡料全是台灣特產,將原隻芋頭、蕃薯和南瓜磨成泥搽在包上,味道好清甜,不像人工香精味咁假。天天新鮮製作,超足餡料仲厚過塊包,卻只售$6 港紙一件,絕對係「大方三文治」!

台中美食
芋頭、蕃薯和南瓜三文治 NT28/HK$6

美誼三明治

地址:台中市南屯區大墩十二街 308 號

營業時間:周一至六 12:00nn-8pm
交通:從台中火車站乘的士 20 分鐘

09) 市長最愛!香煎肉蛋土司

嫌飯糰三文治太健康,可試試這家人氣吐司專賣店,連台中市長林佳龍都曾發文推介,日日排長龍,想食最少等 20 分鐘!招牌肉蛋土司,外表同街邊茶記多士無分別,但煎豬扒醃得好入味有juicy肉汁,煎蛋又香口,食落熱辣辣好惹味!,只需 10 蚊港紙一份昨!

台中美食
招牌肉蛋土司NT45/HK$10

肉蛋土司

營業時間:周二至五 4:30am-12:00noon;周六、日 4:30am-12:30pm
地址:台中市健行路 1005 號
交通:從台中火車站乘的士 15 分鐘

10) 古早味!蛋餅界女神

台中蛋餅一街都係,但這家台式早餐店的蛋餅賣相特別靚,即叫即做,老闆娘更細心將蛋餅排成S形上碟,用Hello Kitty碟裝,好靚!店內有多達 148 款台式傳統美食,如手抓餅、鐵板麵、豬血湯等,但最出名都係蛋餅。另建議大家試薯泥沙律,薯仔內夾集住粟米蔬果,清新好吃。

台中美食
芝麻豆漿 NT20/HK$5
薯泥沙律 NT30/HK$7
總匯蛋餅 NT40/HK$10

嘉香早餐

營業時間:5:30am-2:30pm
地址:台中市大業路 143 號
交通:從台中火車站乘的士 20 分鐘

下一頁:台灣夜市 | 全新台北台中 2 大特色夜市

延伸閱讀:

台中美食 | 吃雪糕不需要站在宮原眼科門口了 | 台灣.日和

台中 大里室內夜市 | 精選 6 款口碑美食