相信對台中有一定認識嘅朋友，都唔會唔知台中火車站行兩步路就到「宮原眼科」，去宮原眼科一定係買鳳梨酥、太陽餅、乳駱蛋糕等手信，或者去食雪糕－講起食雪糕，如果你想搵個位坐下食雪糕，以下講嘅地方可能會令你行多幾步。
台中市第四信用合作社，簡稱「四信」，原本係同名辦理銀行金融的信用合作社，後來於1999年結業並轉讓予中興商業銀行，最後於兩年前成為日出集團嘅其中一個作品。
呢間店嘅門口以及內部建築都保留舊有合作社的建築 (例如門口標明合作社的落成年份)，距離同一集團嘅宮原眼科只有三個街口。與宮原眼科唔同嘅係，合作社主打嘅係冰點同滷味。
門口好似金庫咁嘅合作社，卻是美食天堂，一樓一入門口，就有賣「豐仁冰」嘅吧檯，然後隔離就有賣雪糕嘅櫃檯：一開始就有製作窩夫餅底嘅機器出現，之後有唔同種類嘅雪糕可以比你揀－－有咖啡、茶味、水果、乳酪 (優格) 同朱古力類型嘅口味比你挑選，編輯上次揀咗愛文芒果同伯爵茶兩隻口味再加一個窩夫餅底，比咗錢之後可以免費加三隻配料，編輯加左必試的乳駱蛋糕、土鳳梨酥同兩粒朱古力波波，真係無得輸！
一樓有啲檯凳可以比大家坐下，牆上掛左啲以前合作社嘅相喺度比大家睇，而隔離都有少少日出旗下的產品售賣，大家如果喺宮原眼科未買夠可以喺度執一執。
而上到二樓亦有位坐，二樓嘅吧檯主要賣咖啡、紅茶同冰品，主要同宮原眼科賣嘅都差唔多，但呢度特別在佢有賣滷味！
而三樓除了賣巧克力外，另外有嘢飲同一啲輕食比大家揀，但價錢就比較貴。呢啲不但讓想食日出雪糕嘅你坐下Hea下(去玩緊係要Hea啦)，而且更可以感受一下台中的舊面貌，以後去台中又多個Hea點了。
台中市第四信用合作社
地址：台中市中區中山路72號
前往：台鐵台中車站步行約12分鐘 / 距離宮原眼科只有三個街口
營業時間：10:00-22:00