撰文：CY｜圖片來源：facebook@湯盈盈Angela Tong
湯盈盈錢嘉樂住文華東方 發布女兒浸浴照震驚網民
最近，連錢嘉樂湯盈盈夫婦都加入酒店Staycation風潮，日前帶埋兩個小朋友一齊去香港文華東方酒店（Mandarin Oriental Hong Kong），退房後，都要在網上大讚服務好，仲話知道泳池即將重開，一定下次會再幫襯！
香港文華東方酒店的復古浴缸出名打卡靚，一場去到又點會唔打卡？不過，湯盈盈並非放出自己的出浴照，反而放出女兒的出浴照，與其話性感可人，有網民就話似「想浸死個女」，上連登話「忍咗個女咁耐，終於出手了」，又有網民話係cosplay——「扮演緊浮屍」，最慘莫過於浴缸入面的可愛小鴨鴨都全部「反肚」，鬼馬推斷笑爆網民！
不過，網民唔單止得啖笑，仲喺湯盈盈facebook帖文下留言讚囡囡得意，又話個浴缸完全fit size，剛好夠女兒伸直雙腳，面對鏡頭擺出搞鬼樣貌更加相當搶鏡，真係自小已經充滿明星相！
其實文華東方酒店的海景套房房型聞名已久，房間內配備復古浴缸，正對維多利亞港海景，年間吸引不少名人入住，早前何雁詩、「細龍太」陳偉琪都紛紛入住打卡，而且文華東方酒店出名服務好，難怪連湯盈盈都大讚好舒服，隨時要返去住多次！
