今次推介大家一齊親臨現場發掘驚喜嘅6月節目，嚟自名叫「#ddHK設計#香港地」（Design District Hong Kong）一個為期三年嘅創意旅遊項目，由旅遊事務署呈獻、香港設計中心主辦。雖然今年已經係最後一年，但主辦單位依然用心邀請咗多個本地及海外設計團隊，透過設計思維勾劃出7組令香港人好有共鳴嘅創意設計裝置，希望以創意做引子帶領本地旅客，以唔同步伐節奏體驗不一樣嘅香港地，為維港呢個傳統旅遊景點添加創意設計新意。
《維港放小息》@中西區海濱長廊，靠近添馬公園（展出期：6月5日 起，初步至6月 20日）
細個讀書時大家都期待放小息，大夥兒圍埋玩跳飛機、紅綠燈、猜樓梯等遊戲。到長大進入社會大學後，就變成期待有「放小息」玩吓抖吓嘅時候。事實上玩係無分年齡大小，而且仲有益身心同社交發展𠻹！因此本地設計團隊Napp Studio嘅曾偉俊Aron Tsang，就夥拍另外兩位年青設計師梁皓晴（Rosalia Leung）同李鴻健（Kennif Li），創作咗今次散佈喺中西區海濱長廊嘅五組地面「青磚黛瓦」式遊戲圖案設計——《維港放小息》作品系列。
五款遊戲名稱大家可能耳熟能詳，不過設計師們就為佢哋創造出全新玩法！公眾可以跟隨設計團隊嘅建議玩法樂在其中，或者發揮自己嘅創意思維，探索出前無古人嘅遊戲方式！
以「十字界豆腐」為例，原先玩法最少需要五位玩家。做捉嘅人企喺中間，其餘四人企喺四角。當中間嘅人喊出「十字界豆腐！」所有玩家須互相走位，唔准留喺原地。而佔據唔到四角嘅人就成為輸家，需要企喺中間發指令。當設計團隊跟年青人討論後，後者提出可以令玩法和玩家人數變得更靈活，於是就改用咗唔同形狀嘅色塊作為各位玩家企嘅位置，又增加新範圍線令玩家適當調教可走動嘅範圍。新玩法亦考慮到跨代共融嘅元素，等老友記同小朋友所踏企嘅色塊，跟年青人所踏企嘅色塊有所分別，都幾考臨場反應㗎。
到底今次嘅變奏新遊戲，想帶出咩訊息效果呢？設計團隊卻出其不意地先反問：「大家小時候在玩什麼遊戲呢？大家父母以前又在玩什麼遊戲呢？」接著表示：「我哋早前舉辦咗多場有關公園空間和遊戲設計嘅工作坊，透過舊照片、邀長者收集口述歷史，去了解上一代小朋友嘅經典遊戲。以前物質並唔富裕，但只有一塊空地，一啲簡單工具例如粉筆、麻繩，就能夠將那個空間變成玩樂空間，所以今次我哋邀請咗年青人去重新設計這些經典遊戲，令它們變成對現今小朋友和年青人有吸引力嘅遊戲。我哋希望通過設計工作坊，去提醒大家都曾經是充滿創意和貪玩的小朋友。希望作品通過玩樂連繫人和空間，同時亦連繫長幼兩代。」
設計團隊又補充：「希望喺日常生活中都可以加入玩嘅元素。玩唔一定要到公園、遊樂場、主題公園，亦唔局限於只係小朋友嘅專利。就好似上一代小朋友咁，只要有一塊空地幾塊石頭，加上三五知己就可以成為一個玩樂空間。今次《維港放小息》嘅理念係希望用既簡單又美觀嘅設計，激發大家兒時嘅回憶，同埋想玩敢玩嘅創意。」如果大家有興趣可以喺IG尋找@recess_at_harbourfront，了解更多小故事。
項目「#ddHK 設計#香港地」今年繼續邀請公眾一齊成為持份者，為公共空間注入新生機及發掘更多可能性。只要透過創意設計改造，即可將充滿時代感與童年回憶嘅傳統遊戲，蛻變成新穎且富趣味嘅玩樂活動！而透過唔同嘅感官刺激，亦有助公眾重新投入大自然嘅懷抱！
「維港蛻變」共有七組創意設計裝置，包括《首》 、《#一齊一個人》、《漣．輪》、《聲之穹蒼》、《維港放小息》、《靜觀自然》以及《川流不熄》。大家可以隨心自選訪遊一個或多個設計作品，甚至將佢哋串連起嚟，變成專屬嘅城市步遊路線圖，深度認識香港地及社區文化，同時享受愜意放鬆嘅時光。
「設計#香港地」網站： www.designdistrict.hk
「設計#香港地」FB： www.facebook.com/designdistricthk
「設計#香港地」IG： instagram.com/designdistricthk_ddhk/
(Presented by Hong Kong Design Centre)