香港行山或者叫本地旅遊大約可以追溯至七、八十年代經濟起飛時期開始,打工仔開始搵到食,公餘時間想去減壓輕鬆下,加上一班有心有力嘅前輩開路(真係開山劈路), 造就咗香港行山活動慢慢去到今日咁蓬勃。

即係咁,七、八十年代嘅事係知咁多啫!反而自己喺九十年代有幸跟老竇開始行山,一行十幾廿年,叫做見證咗 90年代行山 以至現今的一些變化。

01 | 著運動衫已經好認真

依家個個行山都著快乾衫、tights褲,當年肯著套運動衫上山已經好畀面喇,牛仔褲上山仲係常態嚟添。或者咁講,tights呢樣嘢,當年只係見過流川楓著,不過都唔知行山都啱著。

02 | 高手一定係著boots

九十年代喺山上見到啲神速高手,個個都係著boots,傾開偈就會介紹boots嘅好處。今日嘅運動生理學就分那麼細,負重玩法可以著高筒厚底,快步行山要著跑山鞋,想行舒服啲就著高緩衝鞋,要好腳感就揀薄底。

03 | 朋友聽到你行山會話你老土

呢點個人認為係兩個時代最大嘅分別,當年叫朋友行山,都可能試過被人話老土同埋悶,只有行山人士先明白行山嘅樂趣,實在估唔到今時今日行山會被人覺得係潮、識玩、健康、有型諸如此類,簡直係行山人士吐氣揚眉嘅一個美好時代。

04 | 山上近乎冇人

記得嗰陣秋天行大東山,除咗一個叔叔之外,就全日冇見過人,依家大家都試過上去睇芒草啦,有啲位直頭係塞住咗,可惜嗰陣根本唔知咩係芒草。

05 | 更加冇見過人跑山

行山嘅人都唔多,依家日日都有人練嘅跑山嘅畫面,當時就更加冇見過喇。

06 | 去登山口嘅交通好稀疏

依家好多登山熱點都有車到,班次亦算幾密;回想那些年入西灣亭嘅村巴只係一部冇冷氣嘅豬籠車,去伯公坳嘅大嶼山巴士亦都稀疏到一個點,基本上唔係預郊遊人士搭,係畀當地居民出入㗎咋。出發時如果走咗班車,又冇的士,就要等到天荒地老。行完出番市區仲大獲,miss 咗班車,就要用腳行番出去。

07 | 電話零信號

記得自己有手提電話係1997年,之前信號係點就唔知了。不過當時基本上去到西貢或者大嶼山,一上山已經收唔係好到,當然亦唔使旨意求救啦。

08 | 邊有GPS你用

應該講宇宙之中係有GPS衛星嘅,美軍亦都用緊,係我哋未有得用啫!依家自己都會懶,好多時靠部Smartphone就行完全程,所以當時擁有巔峰嘅map reading能力。

09 | 個山冇咁多石屎

唔使我講,睇新聞都知,依家個政府唔知搞乜,得閒無事就搵個山鋪下石屎同雲石咁,交交埋埋啲稅居然用嚟搞著個山。當年最多都係用木板加泥土,或者用大嚿石起梯級,又靚又好行……

10 | 地方乾淨過依家好多

公道啲講,如果只計香港人,我覺得leave no trace、帶垃圾返市區嘅意識係高過九十年代嘅,只係依家真係多咗人上山,多少有啲害群之馬,再加上班周圍掉橙皮嘅強人,成個山頭就咁被佢哋「搞彎晒」,要喺山上面發現一堆堆垃圾,其實唔難。

PS:最後多謝子昭幫忙繪畫插圖一張!

 

文︱HikingFever
原文:90年代行山係點樣?
facebook:Feedtrip.hk 戶外活動資料庫