01) 空少爆炸言論 | 乘客派卡片畀空姐是性暗示？
空少：「很多人以為做空姐空少有很多艷遇，雖然稱不上多，但總會聽過一兩單。最常見是客人同空姐傾幾句偈後派卡片，老實講，我做空少三年幾，我都目睹過幾次，而且派卡片未必係富豪，坐經濟艙嘅客都會想有一段浪漫艷遇。以為收卡片只係空姐專利？少年你太年輕了，其實我身邊不少空少朋友都收過內地土豪派的卡片，hehe 味濃。我就冇咁榮幸，只試過被外籍男邀約落機飲杯酒，我當然即刻 say no 啦！」
《飛身到天邊──好做唔做做空少》$78
作者：飛SUN
出版社：SIGN HK
簡介：唔做會計師轉做空少，以畫筆記錄飛人生活。
02) 機上「飛」傭？「邊個偷晒啲廁板紙？」
「前排飛上海北京，出餐前，廁所經常出現人龍，塞到成條巷都係人，我望真啲，見到導遊在廁所前指揮團友：『來來來！每人拿一張！吃飯衛生一點！』到出餐時我恍然大悟，成團客心口都圍住塊紙，原來係廁板紙！同胞們真係好鬼得意！」
《空少傭乜易》$88
作者：傭仔
出版社：點子出版
簡介：抵死插畫道盡航空職場上溫馨、搞笑二三事。
03) 國泰空姐齊齊爆：九霄甩牙驚動爆破組！
「有次飛杜拜，有位乘客發生蝦碌事，驚動全機服務員。話說他在廁所咳咳下，誤吐出假牙跌咗落馬桶！為執番棚牙，客人嘗試戴手套打撈，空姐幫手亦徒勞無功。最後要封鎖洗手間，著陸後搵工程人員『爆破』，花了半個鐘拆開馬桶，先攞番棚牙。」
《由心啟航》 $88
作者：國泰員工合著
出版社：天地圖書
簡介： 國泰官方出版的空服員、地勤文章合輯，中英對照，力sell溫情。
04) 地勤囝囝話你知：商務艙丟空都唔會亂益人！
「關於 upgrade ，我想講公司有晒規矩，丟空冇人坐都唔會亂益人！想免費 upgrade 只有一個可能，就係經濟艙 overbook ，會優先 up 貴賓會員，或者衣著企理嘅乘客。我最多試過一班機 up 40 個客，好睇運氣，拜託唔好再問：『今日飛機滿唔滿？』」
《地勤仔禁區日記》 $88
作者：地勤仔
出版社：經濟日報出版社
簡介：90 後地勤仔血淚史，奇怪麻煩客一籮籮。