日本開關 網民選香港執硬店鋪：啲過江龍實做唔住
日本由10月11日開始開關，馬上吸引了大量港人「回鄉」， 機票更被一掃而空，可見出走的人數不少。有網民就日本通關一事推斷，以下5種香港商店會因而結業，指「要食要買都去日本啦」。
一、 Omakase
以日本廚師發辦的日式小店在香港備受歡迎，Omakase食店於疫情之中增長了許多，當中不單止本地的商家，亦有來自日本的過江龍，所以食物品質上間間不同、良莠不齊。不過他們都有一個共通點就是價格相比起一般壽司貴。
日本開關後，網民推斷港人會選擇到日本品嘗新鮮食材新鮮、烹調手法正宗的Omakase，而香港的品質較差的Omakase食店則會倒閉。網民認為：「去唔到日本咪食嘅omakase頂住先囉」、「可以去旅行啦，仲邊使喺香港食omakase呀」、「平嘅Omakase會執好多，高質嘅都未必會執，keep住大把人book」等回應。
二、Cafe
疫情之下，香港人被逼留在本地消費，市面上亦都多了許多有不同裝修主題的咖啡店，精美室內設計加上特色食物，令到深水埗大南街、灣仔日月星街、中上環等地成為咖啡店的集中地。疫情期間依然出現排隊、Full Booking的情況。
之不過，若然日本開關，港人不再需再限於香港消費，香港的cafe一定會因而生意減少，造成大量執笠，網民回應：「一日冇得去旅行，後生要搵地方打卡，開關就唔使去cafe」、「開得太多太濫」、「真心好多都係打卡cafe，嘢食又唔抵食，無地方先去cafe hea」、「咁多間cafe一星期去一間打卡都去唔哂，根本儲唔到客，好快執哂」。
三、Donki
Donki是一間日式的百貨超市，在疫情期間為港人提供了多樣化的日本食品及生活用品，自2019年7月進駐香港，現時已經有10間。即使是24小時營業，開店頭一年均出現「打蛇餅」，找不到隊尾的現象。
網民推測日本開關後，港人可以直接到日本購買日貨，在本地對日本用品的需要大大降低，所以Donki亦榜上有名。
四、壽司郎
壽司郎自2019年打入香港市場，短短三年間擴張至16間分店，而且幾乎每次到訪都要排隊。而日本開關，港人可以到日本享用類似的壽司連鎖店，譬如活美登利壽司、藏壽司、天下壽司等。
五、松本清
松本清於今年年頭於APM進駐了第一間分店，接著沙田、屯門都有開分店，10月21日又於銅鑼灣有新店開張。雖然一開始有不少港人朝聖，但如果日本開關就可以直接到日本買。網民指：「日本一次買哂啦」、「去日本仲多嘢揀，臉又得一塊，驚買返嚟香港都用唔哂」、「啲貨其他地方都有，唔一定要去松本清買」、「呢家經過都冇乜人啦」等回應。
網民：兩餸飯一定生存到
兩餸飯食店亦在疫情中大量出現於香港各區，連中環商業區都有，但網民認為兩餸飯店一定可以繼續生存，因為：「啲人旅行報復式消費去旅行，返嚟就食平價兩餸飯」、「啲人儲錢去旅行所以要食兩餸飯」等回應。
網民：去旅行唔使食飯咩？！
雖然部份網民認為會有以上店鋪會有執笠的機會，但亦有網民認為去旅行只是短時間，但大部份時間留在香港都會需要以上店鋪，又指：「仲有其餘8個月冇去日本，咁自然平時都會去激安上貨」、「應該話性價比低嘅就會執」、「香港人以後都坐飛機去食飯定係有得去旅行就唔使食飯？」、「壽司郎點會執，以前有得去旅行嗰陣元氣都日日排長龍喎」。