港人被斥玩殘5大放假勝地　破壞力驚人周圍都係垃圾　網民：封晒佢就啱！

港人斥香港地方「自己人玩爛晒」不配擁有　網民：香港人仲可以去邊？

欣澳堤邊早前被指因太多人進入車中泊及進行野餐活動，因而終被封路，令不少網民在帖文下大鬧港人低質素，指「早排行山，成山垃圾；早排露營，草都絕種；去到邊，垃圾跟住去邊」、「如果你久不久就會去那裏，你就會贊成封路，因為你依家會見到一地垃圾，爛拖鞋爛波鞋都有，紙巾盒膠袋，你想象唔到都有。相信夜晚冇嘢做，啲車主清潔自己部車，將雜物拋棄」、「個個目的都係打卡，根本唔會尊重個地方，打完卡就唔會再去，所以唔會珍惜，玩爛就玩第二到重，所以唔抵可憐」。

網民又指香港人「玩爛地方」已非首次，有幾個地方早已被封卻遭人遺忘，雖然感到可惜但仍贊成「封場」，當中包括打卡熱點西環碼頭。

玩爛場地一：西環碼頭

西環碼頭（即西區公眾貨物裝卸區）一直以來都被視為打卡熱點，更有Instagram Pier之稱。其沒有圍欄的海旁設計，加上每逢日落或地面水漬都可拍出天空之鏡的靚相，慢慢地成為公眾看海、垂釣打卡的勝地。不過有街坊曾投訴，指太多人於假日湧至，影響地方正常運作，政府封鎖場地非常合理。「啲人打卡都算，仲要企上啲機械到勁危險，其實呢啲都係他人財產，係咪整壞咗你賠？」、「搞到污煙漳氣，周圍都係垃圾同酒樽，其實真係過份，封都抵」、「又有大媽唱歌跳舞，又有人搞船上家犬，你話香港人抵唔抵無地方去？」

玩爛場地二：長洲

長洲每逢假日都充滿本地遊客，大家平日在市區生活，到島上輕鬆一下當作旅行。不過由於入長洲的人數每每都「逼爆成個島」，令居民極為不滿，指每班船都逼滿人，「落船仲慘，條街都無人」。加上大量港人假日湧入，嘈吵聲不再話下，物價都被拉高，而且不少人玩樂過後都會留下大量垃圾或騷擾民居，因而島上居民曾公開作出言論，指「唔好再入嚟玩」，表示極其厭惡。

玩爛場地三：大澳

同樣是離島，大澳亦被稱為「淪陷地」，以往中秋節時大澳都會舉行大澳水鄉花燈節，成為島上特色。不過近年因靚景吸引了不少街外人湧至，「多人到居民都無路行，塞晒喺橋到」，使大澳逼於無奈地連續幾年取消花燈節。網民慨嘆非常可惜，但又指「香港人就係咁，玩到爛，玩到盡，玩到神憎鬼厭」。

玩爛場地四：元朗大棠紅葉

在港行山要排隊，是近幾年來不少人的總結，指每逢假日郊外活動都會逼爆人，每次有人介紹一個地點，都會引來大批人湧至，就連行山都要排隊實為奇景。有網民指，大棠紅葉正是一個好例子。「每到紅葉時間，大棠真係多人到想象唔到，個個都想去打卡，但你連路都行唔到」、「紅葉都多人到你根本唔可以停留喺到欣賞，一個咁靚嘅地方又浪費咗」、「一多人去，又係見到周圍都係垃圾，影相除口罩，結果成地口罩無人理」。

玩爛場地五：塔門

塔門曾是露營熱門地，早幾年可以說是網上熱門話題，不少人都會自備工具到場留夜，不過有網民指「塔門因為啲人玩到草地都爛晒咁濟，大草原都開始變得沙漠化，牛牛都無嘢食，搞到要食人類棄嘅膠袋同垃圾」、「其實呢個地方本身真係好靚，但一到假日啲帳蓬多到無位行，仲要亂餵嘢食畀牛牛，影響自然生態」、「都唔明香港人點解成日話內地人，但自己又唔檢討吓」、「真係唔知仲可唔可以回復光景」。

網民反駁：香港人仲去得邊？

網上斥責港人「一有景點就湧晒去」，毫不珍惜地方，但其實網民均表示「我有得揀咩？」，指「BBQ場又封，郊野公園有枱有櫈又封，露營地又封，香港人真係仲可以去邊？」、「點解乜都賴香港人玩爛晒，大家放假一定想輕鬆吓，去郊外都要畀人鬧？又唔係個個都搞到咁」、「咩都抵封，就係你呢啲人唔出聲，乜都話好，個個學你咁困喺屋企就好？」