有網民於Facebook群組「迪士尼 買賣 交換 分享 Disney’s Sharing Platform」帶圖發文表示，他在欣賞迪士尼城堡煙花匯演期間，視線被前面騎膊馬的小朋友阻擋，令他十分氣憤，繼而在網上公審：「我真係好想講，可唔可以唔好騎膊馬，真係好無公德心，真係好影響人。」
有當時在事主附近的網民表示：「睇返相，我應該係樓主附近，騎膊馬嘅本身係正我前面，跟住再移過左啲，我生得高167cm都睇唔到啦，我仲要抱住個仔。」
帖文隨即引發大批網民討論，不少網民表示對事主的抱怨身同感受：「我哋前面都有，大家一齊勸佢落返嚟」、「我都好鬼憎！一開show就騎，換位又換唔切」、「我嗰日睇都有，真係好煩」、「你都係一個，我前面係3個」、「自私精永遠都唔會明白『己所不欲，勿施於人』呢啲咁簡單嘅道理。」
網民：成年人畀你遮住冇得睇就係應份同合理？
亦有網民表示十分理解事主的心情：「試諗下畀咗600幾蚊入嚟，一早霸定個靚位打算睇煙花，點知一開場你一個屈尾十舉起個小朋友遮晒後面成村人視線。最慘係去過Disney都知煙花開咗場根本冇咩可能轉到位，結果成場煙花就係望住同影住小朋友個頭嘅話，其實又真係幾灰嘅」、「我諗冇人會怪個小朋友，但個爸爸係的確做咗件影響到後面人嘅事。如果你要講權利，大家都係畀錢入去，點解得小朋友有權睇，成年人畀你遮住冇得睇就係應份同合理？」
同時也有網民指出該位爸爸只是愛女心切，但希望可以多為其他人著想：「唔會話個爸爸無公德心，只係愛女心切啫！但會希望佢可以教識小朋友將心比心，為後面嘅人諗多步，咁咪大家都開心。」
但亦有一派網民認為事主無同理心，指出如果小朋友不騎膊馬就無法欣賞煙花：「我個囡得三歳，唔騎膊馬咁點睇？」、「應該遊樂場禁小朋友入場，呢句啱唔啱聽？」、「點解你唔生高啲？點解唔早啲去排頭位？」、「咁怕人阻到你，早啲去霸前位睇咪得」。
網民教路「抱小朋友胸口」完美解決
有網友表示雖然小朋友不騎膊馬可能無法欣賞煙花，但從事主上載的相片可見，在騎膊馬父女的左前方有家長是以手抱形式，已經讓小朋友與成人可在同一水平下觀賞煙花匯演：「後面果幾對父母都係抱小朋友胸口前，同大人差唔多高，唔算影響到其他人。都唔係同唔同理心，係其他都做到。點解你唔得呢？」，亦有人指如一定要騎膊馬，可以考慮站在靠近旁邊的位置，盡量減低對他人的影響。
除此之外也有部分網民認為迪士尼樂園園方也有一定責任，需管理園內遊人秩序，同時也建議煙花匯演前大可廣播叫遊人坐下來觀賞。
