迪士尼煙花匯演因故障取消　園方致歉：極力嘗試搶修　賠償方案條款有寫明

香港迪士尼爆中秋公關災難　煙花延遲又取消惹民憤

香港迪士尼當日爆發了一場公關災難。事緣當日踫巧是Duffy and Friends的新成員、粉紅色小狐狸Linabell登陸於香港迪士尼樂園，事前迪士尼早已在幾個月前已經大肆宣傳新角色，園方不止邀請了一堆KOL同樂，而且當日只有入場才能領取預訂的LinaBell公仔。同時9月9日亦為中秋節前夕，不少家庭都選擇購票入園，在迪士尼歡渡佳節，因此當日入園遊客相當之多。

而迪士尼煙花闊別港人4年，在近月終於以「迪士尼星夢光影之旅」煙火匯演回歸，不少人都想一睹籌備了4年的新夜間匯演。但原定於8點半上演的「迪士尼星夢光影之旅」煙火匯演，卻因為技術問題只播放了短短30秒突發停止，引起場內一眾譁然，隨即便宣布取消。當遊客們齊往出口離開時，5分鐘後園方以廣播形式改口宣布煙花表演將會延遲，大批遊客又在準備散場之時跑回原地，場面混亂。豈料等待20分鐘後又再次宣布煙花表演正式取消。

遊客炮轟迪士尼安排極差　Facebook洗版式要求賠償

彈出彈入式的宣布令大批遊客當場鼓譟不滿，當中不少人為了在最佳位置欣賞煙火匯演，由6點等到8點半，足足呆企至少2個半小時！大批遊客在園方宣布煙花表演正式取消後不肯離去，紛紛到位於美國小鎮大街City Hall的客服中心要求合理解釋。在場人士一致炮轟資訊混亂，毫無危機應變措拖。其後更有不少人到香港迪士尼Facebook page洗版式留言，炮轟「極差的顧客體驗」、「小朋友問點解迪士尼講大話」，紛紛要求回水及賠償。

網民意見不一　要求賠償好合理 vs 成班西客

事件爆發後，網民對園方的處理手法有著截然不同的反應，一部份人認為迪士尼應就事件公開道歉及賠償：

「剩係得星期五六日先有煙花睇，你諗吓幾多人期待呢場煙花！！高層係咪應該要公開道歉交代返件事？」

「一話延期啲人即時衝返轉頭，眼見一個『動物大遷徙』的壯觀，就知一家大細的滿心期待。但再一次宣佈係取消，當然鼓燥，大人小朋友都失望。俾個合理嘅理由！」

「管理層0反應，完全冇諗住處理，由啲前線係度比人鬧，我係客都覺得佢哋慘。到頭來只係留資料，等回覆都算，你仲要答我最少14日先會覆？你係咪咁樣對啲客啊？」

「煙花話取消就取消，難為我地抱住小朋友等完又等，一句取消累我哋企多20分鐘，小朋友極失望，我問你哋點賠償？」

「不論vip or 即日買飛入場，都需要你哋一個交代同埋賠償方式！」

「又唔係落雨，壞機點解唔賠得？」

「我唔係年飛㗎！你依家賠返個煙花俾我！」

「我唔係西客R著數，但你係咪應該要自動自覺送下嘢賠返張飛呢？」

但亦有網民認為機械故障屬不可預計因素，而且園方亦一直搶修到最後一刻，並不是有意令遊客失望。再指當日大批遊客炮轟前線員工要求賠償，屬西客行為：

「其實冇人想故障嘅⋯你哋有冇諗過人哋喺入邊搶修到最後一刻，就係唔想令大家失望，知唔知人哋幾大壓力⋯⋯唔通專登拖到最後一刻嚟為難你哋咩，拖到最後一刻意思係搶救到最後一刻，咁搞唔掂都冇辦法。」

「迪士尼很注重安全，臨時取消一些活動很尋常。」

「我唔明喎，入到園如果發現某機動遊戲冇得玩，你都唔會衝去要求迪士尼賠或者退票啦！點解冇得睇煙花就要賠？」

香港迪士尼樂園度假區發言人回應事件：團隊已極力嘗試搶修

香港迪士尼樂園度假區發言人接受GOtrip編輯部查詢時表示，9月9日晚上的「迪士尼星夢光影之旅」因技術故障取消。樂園團隊已極力嘗試搶修，最終未能如期演出，謹此向受影響的賓客致歉。同時9月10日及之後的「迪士尼星夢光影之旅」會按照原定安排上演，節目資料可參閱香港迪士尼官方網頁。

香港迪士尼門票條款：取消任何娛樂節目　不予退款或賠償

根據香港迪士尼樂園官方網站《門票條款及細則》中的「其他一般條款及細則」，園方有權取消任何娛樂節目而不作事先通知，亦不予退款或賠償。

基於樂園客量，惡劣天氣，特別活動，安全、保安或秩序理由，或本公司根據當時情況認為需要時，本公司可能會不時更改樂園或景點營運時間，暫時關閉樂園或任何部分，限制進入樂園的人數，及/或暫停任何遊樂設施或取消任何娛樂節目，而不作事先通知，也不予退款或賠償。

延伸閱讀：迪士尼煙花表演突被取消　遊客呆等2個半鐘　彈出彈入式廣播惹民憤要求退款