真人真事,發生在郊野間,出得嚟行,總會遇到呢一類朋友,發生令人無奈的 行山對話 ……

情景一:下午五時半,大棠。

  • A:「請問大欖水塘點去?」
  • B:「都幾遠喎,就嚟入黑,你哋有冇電筒?」
  • A:「冇呀,不過我哋有手機呀!」

教訓:手機電池只能持續數小時,不適宜作行山用,而且萬一要用電話求救,電話冇電就沒辦法了。

情景二:赤徑,單身青年問路。

  • A:「蚺蛇尖係咪向上行?」
  • B:「係就係,不過你一個人?唔係太熟路?」
  • A:「係呀,不過唔緊要啦,我唔趕時間,慢慢行就得!」

教訓:行山安全與否,有很多因素,大多數與行進速度無關。上述青年缺少夥伴,不熟路徑,就犯了致命錯誤。

情景三:某山頭,叔叔用力拉扯樹枝。

  • A:「早晨,請問你做咩拉條樹枝?」
  • B:「仲有咁高嘅山上,我搵支啱用嘅樹枝,用嚟做行山杖呀!」

教訓:行山杖可以買,鴨記幾十蚊有交易。就算用樹枝作杖,也應用枯枝呀!

情景四:某山頭,一對情侶在路邊求救。

  • 問:「請問呢,附近邊度有水買呀?我哋飲晒啲水呀!」
  • 答:「……其實呢頭搵個人都難。」

教訓:起程前先了解路線有冇補給,並且帶夠水先上山 (一般計法,每10公里帶1公升水)。中途發現缺水,就找最快方法離開山頭。

情景五:大東山山頂,有人引吭高歌……

  • A:「獨自在山崗,高處未算高……」
  • B:「先生,唔該可唔可以細聲少少,你咁樣好嘈,好大聲呀。」
  • A:「關你XYZ事呀,犯法呀…… (下刪一萬字)」

教訓:雖則說,每個人行山有不同玩法,而且山野屬公眾地方,人人有自由做自己愛做的事。然而,任何舉動其實都要為他人著想,己所不欲,勿施於人。此謂人之同理心,絕非犯法不犯法的膚淺問題。

很多問題,其實源自大家拒絕把心開放,拒絕用心學習,謝絕謙虛。於是,人就會變得無知。切記,無知並不是罪,但足以致命。