新界第一係沙田定荃灣？
全港18區邊區最好住經常被人討論，最近又有網民發帖詢問「你覺得新界第一係荃灣定沙田？」。樓主先是提出沙田區，指出其超市、街市林立，「新城市、希爾頓、一田超市、沙田街市、大圍街市、禾輋街市，乜都有得賣」。加上「戲院唔介意遠少少馬鞍山都有2間、學校方面係全港最多英中地區，大學又有中文大學，講學車考牌又有駕駛學院，病咗又有威爾斯醫院住，最後仲有沙田馬場」，但在美食方面不算是美食天堂，但直言絕對不是美食沙漠。
網民大力分享住沙田的好處：
【住沙田無得輸】「沙田住的話環境真係無得輸，有單車徑，有河景，周圍又方便，有博物館圖書館有文化氣息，正宗香港90年代新市鎮典範！」
【沙田鐵路屈機】「沙田區鐵路都算屈機，區內多站、同短途、班次密，跳上車幾十秒至分零鐘就可以去到幾百米至一公里外嘅另一個站」
【沙田校網交通齊全】「沙田仲有校網、交通等等，沙田去九龍東同九龍西差唔多時間，過海又有沙中線。」
荃灣美食無得輸！
而荃灣方面則有齊三大日本超市，「AEON識去一定去大窩口店，又大又靜，傳統街市有楊屋道、街市街，戲院又有兩間」、「講起南豐仲有紗廠 文青打卡一流」，而最吸引的是美食多蘿蘿，「小店黃店連鎖店糖水舖、中日韓台東南亞意美港，仲有大鴻輝一大堆放題唱K，基本上你想食乜X都有」。
網民激辯！
荃灣：落雨都唔使擔遮，又可以行街買嘢
網民稱荃灣區最大的優點是「落雨都唔使擔遮，又可以行街買嘢」，天橋貫穿了區內大大小小的新舊商場，加上美食任君選擇。不過也有人垢病荃灣人多車多空氣差，住在海濱附近更會感覺到強烈臭味，直言不會在在海濱跑步，再者單車徑比沙田區相對不足。
網民力薦荃灣居住環境優於沙田：
【荃灣行人天橋網絡完善】「沙田市中心如果要行去瀝源禾輋就梗係方便啦，但係若果要行去乙明美林就已經熱到想死！荃灣完善嘅行人天橋網絡貫通荃灣東南西北，由愉景新城行過去荃灣西都唔使淋雨！」
【荃灣大舖雲集】「荃灣勝在多唔同類型嘅大舖集中喺一區」
【荃灣乜都有齊】「荃灣細心開發之後會多好多嘢玩，跑步嘅，荃灣海邊可以跑屯門，山上有大欖桶引水道同城門引水道，體育館由荃西數到綠楊有5個，荃灣唔驚水質比較差仲有幾個沙灘。食野嘅，川龍飲茶依家仲成日人山人海。」
沙田贏在呢一樣！
網民指沙田區最大的優點是「生老病死都不用離開沙田區」，在校網上也完勝荃灣區，加上現時東鐵綫過海段正式通車，過海返工的交通缺點大大改善。除此之外網民指沙田比荃灣感覺較為乾淨，空氣也比較好，直言「跑步落城門河就得」，單車徑也夠多。不過在食店方面就比不上荃灣，再者市中心地段非常擠逼，在通關後情況可能更差。
