主打日式燒肉的牛角一向有大班fans捧場,最近記者收到消息,牛角旺角放題即將開業,成為牛角首間的任食店,更有和牛放題、自助區美食和甜品任食,即刻約定朋友去食牛角buffet啦!

記者:Joan 攝影:官方圖片、Chi(原文刊於《新假期》)| 編輯:Alva

首間牛角旺角放題店 5月28日開業!

牛角主打日本燒肉,有多款單點肉類、海鮮、內臟、飯食和甜品等等,口碑一向不錯,繁忙時間更不時排長龍!

之前也在幾間分店供應放題,不過都只是期間限定。最近牛角在facebook專頁公開首間牛角buffet會在5月28日開業!

其實早幾日都有個食物fb專頁透露,首間牛角buffet即將在5月底開業!

記者也詢問過餐廳有關部門,據指,牛角旺角放題店仍在裝修中,會趕在5月尾開業,屆時會提供和牛放題、自助區任食美食、飲品和甜品等等,超期待呀!

牛角放題店

地址:旺角彌敦道639號雅蘭中心2樓209-213號舖(前一壽司位置,顯示地圖

指定分店放題回顧

牛角自2016年起,也有推出過牛角buffet燒肉放題,不過只限幾間店舖及於9:00pm後的宵夜時段供應。立即回顧放題有咩食,先望梅止渴!(以下內文價錢為2016年之放題價目。)

燒肉放題 9:00pm起入座 記得book位

燒肉放題 於9:00pm開始,記者早兩日致電餐廳訂位,仍能成功預約9:00pm,店家提醒須準時抵達,逾時不設留枱。9:00pm店舖外已經聚滿人群!

人山人海,迫到似行緊年宵,行到門口登記後,等了5分鐘便可入座,記得book位!另外,入座前要決定好吃甚麼餐。

放題一共有3個套餐,價錢平日由$188-$298不等,每個套餐均包肉類、海鮮和蔬菜等等:$188的只包雞肉和豬肉。

$228的包牛、雞、豬肉;$298的會有上級牛肉、雞肉和豬肉等等,價錢愈貴愈多選擇,記者今次選了中價位$228的套餐,一共有47款食物,即睇有咩食!

坐下5分鐘後,一人送了一碟和牛拼盤,各有兩件和牛牛肋肉、牛角上級牛肋肉、肩脊肉、豚肉和雞腿肉,是唯一可以吃到和牛的選擇!

和牛牛肋肉很爽彈,另外肩脊肉軟嫩有油香。不過食時記著要蘸點它們的鹽醬、烤肉醬和麵豉醬提味。

半個鐘齊order 必食牛舌

究竟變成放題,燒肉質素有沒有下跌?9:10pm落單,9:29pm溫泉玉子沙律和飯等了20分鐘後首先上枱,望落大大碗,切開玉子,蛋漿依然流心,足夠拌勻整個飯/沙律。

而其他肉類於9:40pm亦全部上枱,牛舌、雞翼等望落依然大件整齊,看來沒有偷工減料。

牛肉有網燒一口牛、牛肋肉和肩脊肉,各有燒肉汁和鹽醬可選。另有大大件牛舌!平時散叫一碟牛舌要約$70,今次食多幾碟已經足夠回本!

個人推介辛味醬汁,微辣惹味,口感好爽彈;但肩脊肉連續幾件都很韌,咬不開!

另外,雞肉和豚肉質素亦OK。下單後等得較久,建議大家一次過order,不要等吃飽才加單。

照理10:30pm便要離座,但沒有店員請我們離開,可以繼續燒肉,坐多20分鐘後,依然沒人催促離座,記者自行離開,旁邊亦有很多空枱。出到門口,雖仍然有人等待入座,但人潮已不及9時般洶湧。

總結:

選擇來說,肉類有牛、豬、雞,還有海鮮、蔬菜等40款選擇,而且肉類亦有不同醃醬可選,都算豐富;味道跟平時單點的一樣,都入味,質素OK。

服務方便非常殷勤,很多人手,就算記者抓一抓頭都有店員衝過來問是否要落單,$228可以食1.5小時,多半小時會更好。不過,如果你是這家連鎖燒肉店的fans,一定要來報到呀!

一句到尾:

自認食肉獸就去啦!

下一頁:點心放題 | 尖沙咀任食3.5小時點心 五星酒店25款任叫 | 香港自助餐