一入秋,面書就陸續出現露營照,看到別人有印第安營或者 圓帳營 ,實在太靚、太有feel!極葡萄!但如若自己去露營,怎會用上這些營,又重又難攞又難砌,重點是哪有錢買!YHA 青年旅舍數月前引入了圓帳營,配合其Glamping (豪華露營)計劃,這些機會終於屬於我!
撰文:bu|攝影:Scott(原文刊於《新假期》)

$200有找 大嶼山豪住 圓帳營

在昂坪市集附近不過十分鐘路程, 就有得兩手揈揈Glamping,入住靚靚 圓帳營 !網上預約後,蹺埋雙手,到埗就可見帳篷已經為你搭好,爽!官方指帳營最多可供8人入住,我覺得大營4至6個人就剛剛好,不會太迫,雙人充氣床亦夠大夠「彈」,不怕翌日腰骨痛!不過想camp得夠獨特,就要自備裝飾品,花些心思去整靚個營了!

想沖涼、煮食都有齊設備

雖說兩手揈揈,但三餐就要自備。旅舍提供廚具及餐具,大家可先於東涌購買食材,都很方便。自認廚藝平庸, 大可考慮BBQ,一樣「野」味。旅舍還有提供沐浴設施及大廳,就算玩完一日成身汗,都有得沖涼,不用臭著睡。

$35 簡單早餐 唔使自己煮

一早起身想舒服一點乜都唔做,旅舍也供應簡單早餐,包括方包連牛油、花生醬或果醬、芝士片、煎蛋、玉米片及飲品,不想吃玉米片還有即食麵及燕麥片可選擇。雖然不是豪華或甚麼太特別的早餐,但這個價錢可接受。大家亦要記得食完自己洗餐具!

唔露營都一樣有得住 感受山野靈氣

除露營,青年旅舍也有傳統房間提供,雙人、四人及八人房間,價錢相宜。旅舍負責人Scott儼如這裡的房東,待客人如朋友一樣,住宿時遇上問題儘管找他。 他笑指,不時彼此混熟了,還會自發帶隊跟大家到附近行山!

旅舍點樣去?

01 | 東涌->昂坪市集

於東涌乘搭大嶼山巴士23號至昂坪市集,甫下車見天壇大佛,朝牌坊往內走進入昂坪廣場。

02 | 昂坪廣場

沿路都有指示牌指示青年旅舍的方向。

03 | 心經簡林石碑

走約7分鐘就可看到「心經簡林」石碑及青年旅舍的紅色指示牌,再走約3分鐘便到旅舍。

YHA昂坪戴維斯青年旅舍

收費:圓帳營3人$560起,其後每位$80;旅舍房間每位約$170

備註:訂房時必須其中一位是YHA會員

地址:大嶼山昂坪(顯示地圖

查詢:2788 1638

網址:www.yha.org.hk