行山裝備 絕對要輕巧但有用,呢幾樣嘢唔止幫到你,仲絕對係符合呢個要求。而且,仲令人意想不到!

01 | 打火機

你唔食煙唔會喺山野煮飯,但都應該要帶個火機,火機絕對是輕便而重要嘅求生工具。遇到意外,佢可以生火,用嚟取暖、煮食,以至發出警報求救(如整白煙通知直升機位置)。而火亦係良好切割工具。(GOtrip編按:當然啦,以上狀況全屬危急關頭才可使用,說到底山野地區輕率生火帶來的影響,難以預計,沒有相關經驗,切勿貪得意撻火機害人害己!)

02 | 零食

之前文章《打破謬誤! 要認真思考的行山常識》講過,零食重要性不亞於乾糧食水。要補充嘅係,大熱天時,唔好帶朱古力行山。我真係唔識分朱古力嘅屎,同屎味嘅朱古力。

03 | 衛生巾/護墊

理論上一team人行山應該要有人帶急救箱。不過我就會帶兩塊衛生巾,佢嘅清毒止血功能同急救用敷料異曲同工,遇到有女隊友急需,仲可以幫下手吖嘛!

04 | 密實袋

一落大雨,你喺山頭野嶺必定濕身。而其中最容易整濕嘅係手機同銀紙。其實,就算唔落雨都最好用密實袋袋住部電話,以免被汗水整濕。而且,行山其實亦唔應該帶平日出街嗰個銀包,攞幾張銀紙、證件,搵個細細哋嘅密實袋袋住,就可以上山嘞!

05 | 大膠袋

記住「自己垃圾自己執」。見到郊野有衰人搞到周山垃圾,亦大可發揮大愛精神,幫手執佢哋走。而垃圾最好棄置於馬路邊嘅垃圾桶。