小巴司機年齡中位數達70　冀引入外勞增人手　港人憂再產馬路炸彈

小巴業界冀引入外勞　 解決人手嚴重不足情況

日前香港專線小巴持牌人協會表示，因為本港駕駛小巴的人手嚴重不足，整體欠缺3成司機。人手不足的問題漸現，現時部分司機要返「特別更」，工時或長達14小時；加上小巴司機平均月薪為$15,000，無法吸引年輕人入行。航運交通界立法會議員易志明亦指，過去10年小巴司機年齡中位數升至70歲以上，為避免青黃不接及業界內勞動力不足，協會便公開表示希望政府開綠燈試行引入外勞，以免影響班次甚至無法運營。

小巴司機年齡中位數升逾70　意外頻生

事實上， 小巴司機高齡化的問題一直纏繞著小巴業界，近年內已有多位年紀老邁的小巴司機涉及交通意外。包括除夕夜70歲高齡司機於油麻地撞倒男子並捲入車底、4月中81歲小巴司機於何文田發生致命意外、昨日（9月6日）67歲司機於東廊自炒撞壆等意外。再加上要「追更」、「追轉數」等情況令司機們休息不足，分分鐘會影響交通安全。

運輸署指要考慮多項因素　但樂意討論應對策略

而運輸署發言人則指，輸入外勞一事需顧及本地司機生計，同時也要考慮駕駛文化差異有機會對道路安全產生潛在影響。但當局樂意與業界共商應對策略，並在可行可取情況下於政策上配合。

港人抗拒引入外勞：馬路炸彈嚟！

但市民就對輸入外勞一事十分抗拒，紛紛留言指出外勞不諳廣東話，同時也對香港道路不熟悉，對外勞駕駛小巴一事表示質疑：

「小巴點引入外勞？每條小巴都有指定路線落站位，外勞知鬼香港點行咩？」

「成日講南亞人好危險，大陸人又唔識聽廣東話，又唔識路，請問點引入呀？」

「試過Uber call左南亞司機，本來都冇乜嘢嘅唔係歧視佢哋，但係我去九龍站落車，點知佢跟地圖兜咗我去廣東道中港城再返轉頭，趕時間嗰下真係嬲到爆炸！」

網民直斥小巴公司推卸責任：加人工就自然有人做！

另外亦有人認為人手不足實屬小巴公司責任，原因正正是人工低工時長：

「自己搭緊圍村綠van，據稱小巴司機只有時薪$50」

「加人工就自然有人做，仲少過看更你自己做埋佢」

「以後人工set低啲,無人做再叫政府輸入外勞，咁咪可以賺盡啲」

「人工吸引唔到人，即係唔合理，點解唔係加人工俾返合理人工同福利，而係搵外勞？ 搵外勞笨？咁樣質素只會愈來愈差」。

亡命小巴已成香港隱患　各區皆有超速常客

街上出現亡命小巴已為常有之事，超速常客包括最高時速達115公里的荃灣至旺角線、屯門良景邨開往旺角、元朗開往大埔等。亦有網民直斥：「人工低又逼司機走轉數，搞到小巴司機變咗賽車手，大佬呀！專線小巴都做到左衝右衝，衝紅燈及雙白線爬頭樣樣做齊！」

延伸閱讀：香港小巴司機全世界最惡？網民力數亡命小巴4宗罪：胡亂切線、司機無品