大尾篤租單車黑店：遲還10分鐘收3位數！網民：慣犯嚟

港爸遲10分鐘還單車被收$150

日前有港爸於Facebook群組「舊香港黑店大全 大踢爆 大大大Group」發文抱怨，憶述日前於大尾篤（大美篤）一間單車店租借單車，事前他向單車店職員查詢價錢，對方表示新款家庭單車的租金是一小時$150，他隨即追問對方：「如果玩耐啲點計？」職員向他承諾只收$150租借費用，更稱：「今日無乜人，150蚊得啦，遲少少無所謂嘅。」

事主租借了一輛家庭單車到處遊玩，後來他比原定還車時間遲了10分鐘才回到單車店還車，豈料職員沒有根據之前的口頭承諾只收$150，反而要他額外再多付一小時的價錢：「只係拎住張單話每個鐘$150，比半個鐘又話唔得，根本就係焗住搶！」

他表示，如果當時職員明確表示遲還車要再付1小時租車費，他就不會遲10分鐘才歸還單車，十分不滿店家沒兌現「遲少少無所謂」的承諾。他稱，事發當刻他感到非常不快，並與職員理論，但因為子女在旁，唯有放棄爭論：「唯有比佢賺一次，不過一定無下次囉。」他表示自己並非第一次光顧涉事單車店，他曾經在租借單車時見到類似紛爭發生，當時更要警方出面調停，沒想過曾經目擊過的不快事件會在自己身上發生。

網民鬧爆涉事單車店

港爸的帖文旋即引發網民熱議，大批網民都一面倒鬧爆涉事單車店出爾反爾的行為：「真係老屈喎」、「咁如果俾多一個鐘，我會踩多陣囉」、「150蚊個鐘，可以直頭租私家車啦」、「唔怪之得佢話冇乜人啦」。

網民：間黑店慣犯嚟㗎！

另外也有部分網民分享親身經歷，直指涉事單車店屬慣犯：「我復活節假期嗰個星期一去，見到有人白紙黑字寫明，個阿姐咪都話人哋寫錯，個男人話我睇住你寫喎，阿姐話係你記錯」、「曾經試過差唔多情況，叫我哋7點還車，我哋6點幾去還，佢話我哋日租係去到6點，我哋仲要4、5架車，佢又係話每架車要加錢，又係話冇講過7點還車，最後梗係睬佢都傻，走人」。

網民：其實你又理虧嘅……

但也有網民指出事主的確是遲了還車，即使不足一小時都理應付錢：「自己遲還與人無尤喎」、「佢係話 『遲少少無所謂』， 咩叫少少？ 佢無講明， 佢都可以話佢少少係指一、兩分鐘， 講到尾都係你蝕章。」同時也有網民建議，港爸下次在租借單車時應向職員詢問租借1小時15分鐘的價錢，「寫埋落張單」以免後續的爭執。