近期芒草盛開,不少人都會到大東山一賞金黃芒草美景。正因太多人上大東山,周末去的話,仲多人過旺角。介紹返大東山以外,同樣可以欣賞芒草的山嶺,就是大東山隔離的蓮花山,再話你知5大影相位。包你唔駛同人逼,又可以影到靚相!

蓮花山小知識:

蓮花山是香港第五高的山峰,於大東山隔離,海拔有766米高,大家可以360度望到整個香港,又望到大東山、二東山同鳳凰山。

前往方法:

由東涌出發,可以坐36號大嶼山巴士入白芒村,不過班次非常疏,假日只有五班巴士(0745,1000,1430,1715同1900),平日更少,只有三班巴士(0745, 1000, 1930)!假日的士站又好多人排隊,所以記者決定行入去!先行去東薈城北門,出咗去向右邊沿文東路一直行,行到喜東街,向右轉會見到中化石油油站,靠右會見到一條好隱蔽的小路,穿過後繼續直行!

過了油站,左邊是海,右邊是路軌,好似身處於日本!

第一個影相位

沿路見到啲草,配藍天白雲,靚!

可以行出石灘影相,不過要小心!

行到盡頭會見到條隧道,穿過後就到白芒村口!

由東涌行到入來,要一小時!

沿右邊直行。之後會見到分叉路,靠右直行,行到見到焚化爐,再行前多十米左右,就會見到個好隱蔽的上山入口,旅途正式開始!

上山入口!

初段都係上石級。

第二個影相位

初段要上山,都幾難行,需要一定體力。行咗一陣會見到有舊石,又可以行出去影相,一覽第三跑道的風景!

 

不時仲會睇到飛機降落!

山上小徑。

回望婆髻山。放心,側邊有小路行,唔駛爬上去。

第三個影相位

開始上蓮花山,會見到愈來愈多芒草,愈近就愈多,即刻站到草中央影張相先!

第四個影相位

途中見到有塊大石,又可以企上去影靚相。

 

穿過無限的金黃芒草,就會見到蓮花山頂,可以上、可以唔上,記者就覺得辛辛苦苦行到來,當然要上埋啦!


有條小路上山頂。

終極影相位

上到去766米高的山頂,可以360度睇成個香港!起碼可以影一個鐘先走,撞正日落時間,望向大東山方向,不得了!
:點擊看大圖:

望向大東山方向,有雲海同日落。爬上大石,影番張剪影相就最啱啦!

回程要留意!

上蓮花山頂不難,但落就要小心,都幾斜,重心偏低會易落少少。記得要預時間落山,向南山方向行落山都要一個半小時,入黑睇唔到路,帶定電筒。中途都會有分叉路,靠左行就落到山

見到個牌,重要行多一個鐘。

落山以樓梯為主,會經過山澗,要注意有蛇出沒!青竹蛇雖然有毒,不過你唔搞佢,佢都唔會搞你,佢哋見到光亦會自己走。行到落山腳,又會見到路牌,向梅窩方向行,要上樓梯,經過一個直升機停機坪,再落山,出番石屎地,向嶼南道行多200米左右就會見到大馬路。旅途結束,可以在南山營地巴士站等車出番東涌,或者向梅窩方向行,入去食番餐好!

行山小貼士

1. 需一定體力,要食完飯先好出發
2. 無補給,一定要帶水貼乾糧
3. 落山路段有蛇出沒,要小心讓路
4. 預時間落山,冬天6點已經開始入黑
5. 帶備電筒,遲咗落山都唔怕

蓮花山

路線:白芒村(顯示地圖)-婆髻山-蓮花山-南山-南山營地巴士站
時間:約5小時
難度:✭✭✭✭✩
前往方法:由東涌站坐36號大嶼山巴士/的士/步行至白芒村

延伸閱讀:

澀谷109香港店開幕!即睇10件必買之選

【東華慈善嘉年華】$20體驗門票連「陀飛輪」都包?

【東華慈善嘉年華】逐一解答!出發前必讀9大Q&A

香港假日遊--東龍島@自由.旅生