我山雞喺呢度寫咁多篇文,講咗咁多嘢,全部係自己膚淺嘅經驗,我只希望藉著呢個平台同各位行山友交流、切磋。大家千祈唔好當我係咩權威,呢個世代,資訊咁流通,大家亦懂得獨立思考,絕對唔會有咩權威。

講完上一篇「婆仔上山法」,點都要講落山要訣,避無可避。好嘞,將我所知嘅盡講啦!我戴咁大個頭盔,一來出自肺腑,二來今次講嘅話題,其實我相當冇信心。因為,我畏高,我怕落樓梯,我怕跌,所以我更怕落山。

延伸閱讀:專人教路行山上樓梯大法|婆仔式上樓梯減輕腳痛及扯氣

撰文:fitz.hk|編輯:CY|圖片來源:fitz.hk

秋冬郊遊必學落山要訣!新手輕易掌握減低落山疲倦感

落山要訣(包括樓梯、斜路、碎石路):

  1. 盡量將重心「坐低」,以免身體失平衡碌落山;
  2. 雙腳微彎,有助降低重心,亦可以減少雙腳衝擊;
  3. 上半身微微後傾;
  4. 微微側身,左右腳可交叉而行。若落山時失平衡,因重心已「坐低」,所以只係屁股著地,損傷有限(若太斜嘅碎石路,甚至可一邊手觸地)。

秋冬郊遊必學落山要訣!新手輕易掌握減低落山疲倦感
(圖片來源:fitz.hk)

嗱,上面四點其實只係好基本好基本好基本嘅心得,只係保護你落山嘅時候唔會一仆一碌,唔保證你行得快。落山最難掌握嘅問題,其實係因為要用比較少嘅體力,心態上希望可以加快速度。但其實落山(由樓梯以至碎石路)需要比上山更多嘅耐性同專注,因為落山時踏錯一步,後果相當嚴重。

秋冬郊遊必學落山要訣!新手輕易掌握減低落山疲倦感
負重落山更須小心。前頭呢位哥仔,已掌握落山基本要訣:重心低、雙腳彎曲、側身。(圖片來源:fitz.hk)

落山最重要嘅係「腳感」

打籃球有所謂「手感」(有手感嘅球員可以10射10中),咁落山嘅「腳感」呢?大致包含:對路徑嘅判斷、身體平衡嘅感覺、對自己能力嘅信任,甚至對每嚿石頭嘅判斷(嚿石會唔會鬆)。上述種種,全部都要喺你落腳嗰一刻,全部作出決定。而呢個直覺,根本冇得教、冇得學,全部係由你自己一步一步操練所掌握得到。

秋冬郊遊必學落山要訣!新手輕易掌握減低落山疲倦感
有人話用行山杖落山會安全啲。但係我見用行山杖落山,而跌傷嘅人都唔少。(圖片來源:fitz.hk)

補充一句,落石屎路有咩方法減少雙腳衝擊?我就會跑落山,長痛不如短痛,所以行山之餘,都應該間中練下跑。講咗咁耐,咪怪我老套,行山始終無可避免都係計K數。K數夠嘅話,由雞公山衝落水浪窩,你都唔會腳震震囉!