萬聖節2020 | 海洋公園哈囉喂集體回憶 | 羅蘭姐 19個搞鬼造型回顧！
2019 羅蘭成為榮譽「龍婆」
意念來源：港產電影
2019年是羅蘭姐連續第10年化身萬聖節角色，是次宣傳片是以港產電影為主題的「香港靈異結界」及「盂蘭老大街」為重點鬼域，由羅蘭姐與林雪及馬來西亞女神林明禎主演，片中的孫女林明禎為了替相依為命的外婆羅蘭姐烹調「溫體肉」，會引誘男同學回家，再烹調給羅蘭姐享用，情景令人不寒而慄。
2018 羅蘭化身「AI龍婆」
意念來源：AI機械人
這年海洋公園將羅蘭姐飾演的經典角色「龍婆」加入科技元素，進化為「AI龍婆」！廣告中，麥明詩向由羅蘭姐飾演的龍婆問米，以尋找被困在智能手機的姊妹，最後龍婆被AI機械人的姊妹上身，而成為「AI龍婆」。
2017 羅蘭扮演俏護士
2017海洋公園哈囉喂，羅蘭姐以一身恐怖護士造型登場，是次羅蘭姐扮護士騷長腿，靚呀！
2016 金髮羅蘭 Ghostbusters
意念來源：《捉鬼敢死隊》
這年除了有鬼屋「16禁」極級驚嚇鬼域主題，仲有羅蘭姐扮《捉鬼敢死隊》廣告，「隊員」仲有「卡比獸」秦煌同埋邵音音！
海報一出，即時發現其他代言人的搞鬼打扮！
「卡比獸」變身秦煌去捉鬼 Ghostbusters
秦煌同你一齊跑去捉鬼！
霸氣十足 邵音音 Ghostbusters
音音姐咁醒目，一隻鬼都唔會放過！
2015 羅蘭x羅家英，攞你命Fifteen！
意念來源：《Michael Jackson Thriller》
2015年迪士尼搵咗Do姐做代言，海洋公園竟然搵羅蘭姐扮MJ！真係事有湊巧！
喪屍做主題，令人驚喜仲有「家英哥」扮羅文，大家仲記唔記得點唱？
光加熱就等於火，羅加英就等於我，
哈囉喂再加上你，腎上腺提高更多，
所以你應靠近我，不要再咁鬼囉嗦，
只要喪屍肚仔餓，你再也沒法躲hey！
2014 羅蘭x夏蕙姨x盧海鵬
意念來源：JUNO加持！《殭屍LIVE》
這一年JUNO執導的《殭屍》爆紅，主題樂園直接找來麥大導演設計鬼屋。廣告甚至邀請到羅蘭姐、夏蕙姨扮孖妹！至於在《殭屍》電影中扮演看更的鵬哥，同樣有又驚又cutie的演出。
2013 羅蘭唱歌劇@哈囉喂「全日祭」
意念來源：《孤星淚》
南瓜城大起革命，實行由地底玩到上地面，狂呼「全日祭」！同你由日到夜玩盡哈囉喂「全日祭」近80項景點同活動！這年題材合家歡，大人細路都啱玩！
2012 Wyman x 羅蘭 聖羅蘭
意念來源：《聖羅蘭》
十月大潮聖
羅蘭姐與Wyman一齊現身，一身「聖羅蘭」造型登場，學足已故時裝設計師聖羅蘭的cool爆造型，搵埋香港時裝界潮人Wyman，令人非常驚喜！
2011 嘩鬼建國－－哈囉喂共和國 羅蘭驚嚇閃現
意念來源： Lady GaGa （第二代）主唱：JW
這年找來名模林莉聯同數十嘩鬼，在西貢一片場為主題公園的哈囉喂活動拍廣告片。她扮演女首相「Lady鬼鬼」，花了五個鐘化妝！哈囉喂共和國以百鬼歸巢為主題，有齊中、西猛鬼。宣傳 MV 仲有幾秒閃現羅蘭姐！少啲眼力都睇唔到！
2010 哈囉喂10周年 ! 羅蘭 + 隆胸韓妹扮Lady GaGa
「Ha ha halloween, we are waiting for your scream。」
「到十年 鬼咁癲 趁有命 癲下先。」
韓國鬼后 crossover 港產龍婆！海洋公園十月全城哈囉喂廣告中，兩人又唱又跳，當年片段於 YouTube 點擊次數高逾27萬。人氣鬼后抹甩粉面黑淚，真身是韓國女子組合 Cleo 的 韓妹蔡恩真（EJ），直認早年曾整容及隆胸，在韓打滾十年半紅不黑，想不到陰差陽錯，今鋪竟在香港靠扮鬼嚇人嚇上位！
2009 聽人講，不如自己撞 ｜ 謝天華 & 司徒法正
2009年海洋公園搵咗司徒法正做代言人，拍攝「全城哈囉喂司徒法正系列短片」，仲帶大家行一條辮子路！廣告驚嚇十足，有市民觀看後仲情緒不安添！比起 謝天華 Laughing 哥 收納二五鬼更有睇頭！
司徒法正仲親自帶大家行一次辮子路，似乎辮子姑娘嘅傳說恐怖啲喎！
2008 哈囉喂08新配慌 | 泰臣
2008年就用香港最地道嘅驚嚇傳聞同鬼故事做主題，電梯同深夜小巴都係常見嘅鬼古場景，今次搵埋好戲之人泰臣做小巴司機，想唔驚都難！
海洋公園將哈囉喂由公園玩到網上，在facebook下載「08哈囉喂新配慌」遊戲嘅用家，兩周內達到32萬人次！
2007 講得鬼多終遇鬼
講廣東話時不時會用到個「鬼」字，海洋公園就用咗香港人講嘢嘅習慣做主題：「鬼叫你咁蠢！」「你嘔乜鬼啊？」成日鬼鬼聲，撞鬼唔好怨人喇！
睇嚟以後鬧人都係唔好成日鬼鬼聲，費事啦！
2006 嚇到你阿媽都唔認得
2006 年開始加入香港人講嘢嘅特色：「快到、驚到、慢到阿媽都唔認得！」小心哈囉喂真係會嚇到阿媽都唔認得！
2005 哈囉喂嚟撞九大鬼
九大簋聽就聽得多，但唔係時時都有得食，哈囉喂就話去海洋公園分分鐘可以撞齊九大鬼！
2004 哈囉喂專收你班鬼
哈囉喂嘅廣告開始愈來愈大膽，畫面當然要大膽啲，先滿足到觀眾，因為觀眾都是嗜血的！一於畀觀眾喺入場之前，都可以睇廣告過下癮！
2003 國際嘩鬼會議
第三年嘅廣告開始有「問米」畫面，仲有鬼新郎同鬼新娘出現，試一試水溫，睇下觀眾接唔接受到！
2002 哈囉喂嚇到你 we嘩鬼叫
初期的哈囉喂廣告仲係比較保守，怕嚇親電視觀眾，只係介紹咗哈囉喂引入當時大熱嘅「盜墓迷城」做真人騷，同一連串嘅鬼屋。
2001 全城no. 1 驚嚇派對 哈囉喂初誕生！
哈囉喂嘅廣告年年都好精彩，但大家可能估都估唔到，第一年嘅廣告係最後五秒先見到哈囉喂嘅蹤影！
