行山裝備,其實講乜都冇用,最緊要一定係水!不過,對新手而言,雖則知道 行山帶水 係好緊要,但要帶幾多先夠?首先要明白,帶幾多水要考慮以下幾個因素。

行山帶水要注意的 5 大事頂!

01 | 路線

路程愈長就要預備多啲水,條路愈難行亦都會飲多啲。

行山帶水

02 | 天氣情況

參考書話,氣溫超過33度,濕度超過80%,就會影響身體排汗機制,必須飲水以調節體溫。就算唔係33度咁極端,25度同30度都好大分別。

行山帶水

03 | 身體狀況

體能好自然需要較少水。行山前睇下自己嗰排fit唔fit,千祈唔好高估自己,有一段時間冇運動就好自為知。

行山帶水

04 | 中途補給情況

我只係指行山途經的士多店舖,補充飲用水嘅地方,並不包括溪澗河流。山野流水有好多睇唔到的污染,除非你會行山帶cook set煲水。

行山帶水
山澗溪流嘅水,我就唔會亂飲。

05 | 負重能力

科學小常識 — 1公升水=1公斤。攞多1公升水就要多1公斤負重,2公升就要孭多2公斤……如此類推。而負重又會直接影響你嘅表現,令你行得更辛苦。死味?

行山帶水

有冇帶水方程式?

講咗咁多,間中聽到有人問:「咁鬼多嘢要諗,咁有冇一條方程式可以計到行山要帶幾多水?」

Sorry囉!我唔係圖靈(Alan Turing),冇佢咁聰明。我嘅做法係,憑經驗。以我自己為例,一般情況我都以每10km帶1公升水為基準,條路辛苦啲會加啲,天氣熱啲又加啲。

例子:

麥徑2段全長14公里,以我基準應該帶1.5公升。但西灣山真係唔係人咁品,山頭又焗又斜,咁預多0.5公升;若果天氣熱又加多0.5公升。不過,大浪西灣有茶水檔,可作補給,所以又可減去呢段路嘅5公里。所以,我帶2公升就可以。(講多一次,每個人嘅體能同飲水習慣唔同,完全要憑自己經驗。)

1,500ml + 500ml(西灣山)+ 500ml(天氣熱)- 500ml(大浪西有補給)= 2公升

行山帶水
大浪西有幾間茶水檔,係行山補給站。

注意:

  1. 救命水:行山無論幾唔夠水都好,都要留番一小部分作為救命之用。遇到迷路、隊友不適等意外,嗰一樽水隨時解救到你同你嘅隊友。
  2. 水樽用完唔該攞番出市區嘅回收桶。
  3. 起步前飲番夠本(我會自隊500ml寶礦力先起步)。