相信大家身邊都不乏住新界嘅朋友,「嘩!你住咁遠!咁夜晚約旺角你ok㗎嘛?」「ok……」以上對話有冇覺得似曾相識呢?咁「就得人」嘅佢地,背後受左幾多委屈你又知唔知?一齊睇下新界人嘅日常啦!

文:Purple弟弟(原文刊於經濟一週)|圖片來源:「愛回家之開心速遞」劇照

1.搭巴士遲到一兩次後,老闆會迫你搭地鐵

住新界出市區做嘢車程遠,時間長已經係老生常談,有幾慘都唔需要再多講。不過最慘係住新界唯一可以保證預計到時間嘅交通工具只得地鐵(一般情況下),當你搭巴士遲到一兩次之後,老細就會同你講:「搭地鐵啊嘛!」呢個時候新界人內心已經崩潰,但臉上依然掛住港島區式SALES笑容。

新界人嘅無奈真係有苦自己知...... (圖片來源:「愛回家之開心速遞」劇照)
新界人嘅無奈真係有苦自己知…… (圖片來源:「愛回家之開心速遞」劇照)

內心在咒罵「鬼唔知你啊媽係女人,我巴士平又平過地鐵,如果無塞車或交通意外時間又差唔多,仲要有位坐!我真係搵唔到任何一個要搭地鐵嘅理由。」

張口在說著「我會試下㗎啦。」

如是者,新界嘅朋友遷就咗佢老細。

新界人港島區式SALES笑容示意圖 (圖片來源:「愛回家之開心速遞」劇照)
新界人港島區式SALES笑容示意圖 (圖片來源:「愛回家之開心速遞」劇照)

2.同事聚餐地點,距離自己的家愈來愈遠

當你因為遲到被訓斥一番之後,返埋位坐低做嘢果陣,你隔離位個Yuki就明知故明咁問:「遲到啊?」

「喺啊,住得遠巴士一塞車就咁!」

「乜啊,住得近先易遲啊,成日覺得好快好快之後就出事!」

嗯,非洲啲人無嘢食都無你豐衣足食咁慘,食得多會撐爆個肚,內臟器官受損而死。

「咁今日HAPPY FRIDAY一唔一齊成班同事食餐飯啊!」

「好啊,去邊啊?」

呢句說話喺已經做好覺悟嘅新界人先至講得出口,如果當年湯告魯斯套Mission: Impossible嚟香港拍,題材一定係住天水圍嘅你,點約同事收工之後去屯門或者元朗食飯!唔洗問都知班同事一定會因為太遠而拒絕,而呢個星期五嘅晚餐,你只會離你屋企愈來愈遠。

如是者,新界嘅朋友遷就咗佢同事!

新界人參與聚餐要做好出遠門嘅覺悟!(圖片來源:「愛回家之開心速遞」劇照)
新界人參與聚餐要做好出遠門嘅覺悟!(圖片來源:「愛回家之開心速遞」劇照)

3.親戚飲茶要齊人,住新界必定是遷就的一方

同同事食完飯返到屋企嘅你已經疲憊不堪,老媽子遞上熱湯語重心長咁叫你聽日星期六早啲起身,你擘大個口得個窿咁問:「點解?」原來本身約左聽日嚟飲茶嘅親戚有人因為太遠唔方便,所以放飛機,老媽子於是好偉大咁提出咁不如我地過去,齊人啲熱鬧啲。

諗諗下呢班住港島區嘅親戚已經幾年冇嚟,由幾時開始住新界嘅人一定係遷就嘅一方,我真係看唔透。

如是者,住新界嘅一家人又遷就咗佢親戚!

同親戚飲餐茶都要「出城」!(圖片來源:「愛回家之開心速遞」劇照)
同親戚飲餐茶都要「出城」!(圖片來源:「愛回家之開心速遞」劇照)

所以如果你身邊有呢啲新界朋友,要好好珍惜同設身處地,得閒就返佢地一次半次!當你同新界朋友食完晚飯,飲完酒,已經沖好涼準備瞓覺果陣,唔好唔記得果位朋友,依然係天邊嘅一方截緊泥鯭的返屋企。