一碗嗱喳麵,靈活多變。十幾廿款餸,一撮油麵,拋進百二、三度大滾水,夾起大腸、剪斷魷魚,餸料麵食落碗,舀兩匙熱湯,淋匙辣汁,一碗車仔麵,三十幾秒間誕生。車仔麵檔,藏身街頭巷尾,是港人多年來鍾情的本土味。功夫多,利潤低,難得仍有不少真‧港人,不怕辛苦,堅持將這味道延續。今次走勻港九新界,真金白銀秘密試食,在芸芸車仔麵店中,選出車仔麵之王。讓我們向這庶民美食致敬!

text: Ruby | photo: Hong、Kwan Yiu、Meck、新傳媒資料室(原文刊登於新假期周刊)

1)  車仔麵之家 生炒咖喱魷完勝

這次季選,以立食車仔麵聞名的灣仔車仔麵之家,力壓群雄成王,決定性因素,就是一味生炒沙嗲魷。十個客人,十個必點,就知好嘢。夾一條魷魚鬚,沙嗲汁完全掛面,未吃,香濃味先撲鼻而來。入口,煙韌彈牙,沙嗲滲入魷魚每一部分,有叫人追著吃的衝動。每位評審都大讚,通通給滿分,無可挑剔。

local_noodle12

評審點評:78.6分(100分滿分)

餸料(38.8/50):魷魚炒得入味,酸齋甜酸度適中,惟大腸有點失準,有豬膻味,但軟硬度剛好。
粉麵(15.5/20):麵底爽、有蛋香,煮麵時間控制準繩。
湯汁(16.3/20):湯底以雞骨、豬骨熬製,愈煮愈濃。
價錢(8/10):十餸麵 $80(餸料每款 $7-9,粉麵 $7-14)

local_noodle18

車仔麵之家
地址:
灣仔晏頓街1號A舖
營業時間:星期一至六 7am-6pm(星期日休息)

2)  肥哥車仔麵 爆炒辣汁搶分

肥哥車仔麵招牌的有湯底和辣汁,累積三十年經驗的肥哥,特製了甜香微鹹的湯底,至於另一名物則是辣汁,橙紅色辣汁面上有尾指大小的辣椒粒和蒜粒,有四個辣度的辣汁製成。單是一匙小辣,足以令人辣得標汗,其它地方吃不到的。

local_noodle10

評審點評:75.2分(100分滿分)

餸料(36.9/50):餸料有特色,灼牛肉夠滑,有牛味,正!原個雪耳,索晒湯汁,味道香,無可挑剔。
粉麵(15/20):粗麵爽彈,無鹼水味,有少許蛋香。
湯汁(16.3/20):湯汁加入冬菇調味,做湯底多了甜香。自製辣汁有大量薑、蒜,有層次,不是死辣。
價錢(7/10):十餸麵 $89(餸料每款 $6-12,粉麵 $7-9)

local_noodle14

肥哥車仔麵
地址:
石硤尾白田偉智街 38 號福田大廈地下 55 號
營業時間:星期一至五 8am – 7:30pm;星期六 8am – 7pm(星期日休息)

3)  華記車仔麵 創意王子一團火

論全港最浮誇車仔麵,非華記莫屬。因一到村口,就會見到一個非常搶眼的廣告牌。店舖每日提供三十多款餸菜,除了傳統豬皮、豬紅、蘿蔔外,還有獨門自創餸料,天使雞翼、炸雲吞等,將新元素滲入車仔餸中,這種創意得來不忘本的精神,值得嘉許。

local_noodle17

評審點評:69.6分(100分滿分)

餸料(36.3/50):餸料大部分都中上質素,當中炸物最欣賞,雲吞即炸夠香脆,食落脆卜卜。另外唔炸雞翼用綠茶煙燻,微甜中帶綠茶的甘味。
粉麵(14.8/20):麵底不錯,煮麵姐姐時間控制準繩,加上麵條無預早浸水,所以麵質彈牙,不會過腍。
湯汁(13.5/20):辣汁夠辣,但香味欠奉,餘蘊帶苦,應該炒過龍了。
價錢(5/10):八餸麵 $82(餸料每款 $6-15,粉麵 $6-9,另加 $15炸雲吞 3 隻,$15 唔炸雞翼 2 隻)

local_noodle11

華記小食店
地址:
青衣涌美老屋村 90 號地下
營業時間:星期二至日7am – 3pm

4)  永年士多 餘韻回甘藥材湯

永年士多是元朗地標,五十多年歷史,由士多雜貨到賣腸粉魚蛋車仔麵。第 3代接班人劉逸軒大刀闊斧將老店改裝成時尚風格,客人排隊落單,等叫號碼攞麵,十足車仔麵快餐店。

local_noodle09

評審點評:66.6分(100分滿分)

餸料(33.8/50):普偏配料都做得不錯。特別是豬腸乾淨和流心蛋夠流心,唯蘿蔔未夠腍。
粉麵(12.5/20):油麵一般,可以再腍些。

湯汁(13.3/20):湯底濃郁,咖喱辣度足。
價錢(7/10):十餸麵 $89(餸料每款 $8,粉麵 $8)

local_noodle04

永年士多
地址:元朗教育路 88 號寶城洋樓 2-4 號
營業時間:星期一至日 12nn-10pm

5)  麵麵店 五十款車仔餸列陣

為吸引年輕人,食物選擇特別。車仔麵麵底有十款,有常見的幼、粗、油、米、河粉外,更有讚岐烏冬。餸菜更有近五十款,傳統的有豬腸、豬皮、豬紅、蘿蔔等,還有新派車仔餸,如麻辣蓮藕、沙葛餃、魚肉春卷都有,幾得意。

local_noodle13

評審點評:63.8分(100分滿分)

餸料(32/50):最好味是麻辣蓮藕,又麻又辣,菜脯亦夠辣,辣食夠惹味。
粉麵(12.8/20):食真啲,有麵香,富蛋味。
湯汁(13/20):湯有鹼水味,影響味道;河粉幼滑好味。
價錢(6/10):十餸麵 $94(餸料每款 $8-12,粉麵 $14-17)

local_noodle05

麵麵店
地址:佐敦廟街 274 號
營業時間:星期一至日 10am-10pm

下一頁:仲有入選米芝蓮車仔麵

6)  新記車仔麵 輸在份量太少

論近來最紅車仔麵店,非新記莫屬,事關Jacky Yu早前在新記吃了九個餸連油菜 $120 車仔麵後成網上熱話。新記擁躉一向多,其靈魂之辣汁是招牌,據說是老闆每晚 2 點收舖後,邊炒邊撈的成果。不過定價相比其他店高,而且每款餸份量比正常少四分一,連碗麵都細過人。

local_noodle01

評審點評:62.3分(100分滿分)

餸料(33/50):餸份量少,碎濕濕。不過軟腍滷水牛肚,入味滷水蛋,還有脆卜卜的炸魚皮,都不容錯過。
粉麵(12.8/20):份量較其他店少。
湯汁(13.5/20):辣汁夠辣,有少許嗆喉。至於馳名滷水汁,味道偏甜,又時更蓋過餸味。
價錢(3/10):十餸麵 $110(餸料每款 $10,粉麵 $10)

local_noodle15

新記車仔麵
地址:銅鑼灣登龍街 49 號地下 B 鋪
營業時間:星期一至日 1200nn-11:30pm

7)  榮安米芝蓮粒星?

2015 入選米芝蓮十大香港街頭美食。店內員工至少半百,發黃的牆身、銀色筷子筒,有人覺得懷舊、有人覺得邋遢。三十多年前由舊士多起家,當時自家製滷水雞翼最熱賣,後轉型車仔麵,成荃灣地膽最愛。

local_noodle06

評審點評:61.9分(100分滿分)

餸料(26.8/50):大腸有少許豬羶味,豬皮有沙,衛生麻麻。
粉麵(12.3/20):麵底較腍。
湯汁(12.8/20):論滷水汁一定是榮安,滷水夠陳,香味有層次。
價錢(10/10):十餸麵 $70(餸料每款 $5-8,粉麵 $5)

local_noodle02

榮安小食
地址:荃灣大河道 24 號 B 地下
營業時間:星期一至日 11am-12mn

8)  榮記最多五餸

無人不識的名店。現有糖街及渣甸街兩分店,門前人龍不絕,連遊客都識搵上門。最有趣是每車仔麵最多只可點五餸,聽樓面阿姨解釋,是因麵碗太細放唔晒……

local_noodle03

評審點評:61分(100分滿分)

餸料(30/50):蘿蔔,豬紅,魚蛋水準正常,每樣配料欠驚喜。
粉麵(13/20):麵腍了些,可能時間太耐或用水浸得太耐。
湯汁(14/20):湯底香甜,有西洋菜味;辣汁香,但味道不夠,不惹味。

價錢(4/10):單拼/雙拼 $32、三拼 $38、四拼 $44、五拼 $50(連粉麵)

local_noodle16

榮記粉麵
地址:銅鑼灣糖街 27 號 A 地下
營業時間:星期一至日 11:30am-10pm

9)  文記水準飄忽

相比其餘八間車仔麵檔,文記年資算短,只開業五年。身處麵食名店雲集的深水埗,卻經常滿座。文記勝在多選擇,配料人無我有,每日近五十款選擇。不過水準飄忽,同一個阿姐剪餸,柚皮時薄時厚,影響口感。

local_noodle07

評審點評:57.9分(100分滿分)

餸料(31.3/50):豬油渣,正!直情鬆脆到可以送酒。柚皮煨得好入味。
粉麵(10.8/20):麵底一般。
湯汁(10.8/20):沙嗲、腩汁都過甜,整體味道偏甜。
價錢(5/10):十餸麵 $97(餸料每款 $8-12,粉麵 $7-8)

local_noodle08

文記車仔麵
地址:深水埗福榮街 121 號地下
營業時間:24 小時

下一頁:港式魚蛋 |港九新界 7 大 魚蛋檔比拼

延伸閱讀:

唔行無得食 | 8大 隱世 山水豆腐花